Por Europa Press / Redacción | Santiago de Compostela | 30/07/2021 | Actualizada ás 18:08
O conselleiro de Sanidade da Xunta, Julio García Comesaña, cre que "se todo vai como ata agora", na próxima semana Galicia "alcanzará o pico de pacientes de Covid ingresados en hospitalización convencional" no marco da quinta onda.
As estimacións de Sanidade apuntan tamén que probablemente na semana seguinte, a segunda de agosto, alcanzarase o pico de pacientes ingresados nas unidades de críticos.
No transcurso do acto da firma dun convenio para a construción dun novo centro de saúde en Vilagarcía de Arousa, García Comesaña indicou este venres que a situación actual en Galicia "non é de baixada, pero si dun freo na suba".
As incidencias acumuladas a 7 e a 14 están practicamente na metade. "E iso é unha moi boa nova", manifestou o conselleiro, quen sinalou que "aínda quedan uns días de subas de positivos e de subas de casos ingresados". A partir de aí, engadiu, esperan e confían "nunha baixada".
"AGUANTAR UNHAS SEMANAS"
Comesaña solicita aos cidadáns un esforzo adicional, "aguantar unhas semanas máis, seguir respectando as normas, limitar os contactos na medida do posible e non deixar de usar a máscara".
E fixo especial fincapé na xente nova, á que pediu que acuda aos cribados que se están facendo, "para tratar de detectar os casos, disgnosticarlos e asilarlos".
Así mesmo, sobre os mozos, nunha entrevista na TVG manifestou o conselleiro este venres que está preto a volta ao curso. "Cos datos que manexamos, unha parte dos estudantes estará vacinada, os de Bacharelato, por exemplo, e esperamos ter vacinados os cursos máis alto de ESO", sinalou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.