Galicia estáncase en casos activos pero supera os 300 hospitalizados con covid

Os hospitalizados pola Covid-19 en Galicia baixan a 301, un menos que na xornada anterior, mentres que os casos activos tamén descenden lixeiramente --16 menos-- e se estancan nos 18.869. Os novos contaxios, pola súa banda, baixan pero mantéñense por encima do milleiro, en 1.171. Ademais, a taxa de positividade segue en ascenso e alcanza o 12,11% na Comunidade galega.

Segundo os datos actualizados na mañá deste sábado pola Consellería de Sanidade con rexistros de ata as 18,00 horas do venres, recollidos por Europa Press, as persoas ingresadas pola Covid-19 en UCI ascenden a 40 --catro máis--, pero descenden en cinco as que se atopan hospitalizadas noutras unidades --261--.

Por áreas sanitarias, a presión hospitalaria alíviase na de Ourense, que suma un paciente Covid máis en UCI --catro en total-- e reduce a 34 os ingresados noutras unidades --seis menos--; e na de Vigo, onde hai un paciente menos hospitalizado en planta --45 en total--, pero mantéñense en dous os ingresados en críticos.

Tamén descende na de Lugo, que mantén o tres pacientes Covid en UCI, e rexistra un descenso de ingresados noutras unidades --catro menos--, co que quedan en 37; e en Pontevedra-O Salnés, que aínda que mantén seis pacientes en críticos, rexistra tres menos en unidades convencionais --39--. A área sanitaria de Ferrol, pola súa banda, conta cun paciente menos hospitalizado --14--, e mantén seis hospitalizados en unidades de críticos.

Doutra banda, a presión hospitalaria aumenta na da Coruña e Cee, onde soben a 16 os pacientes Covid en UCI --dúas máis-- e soben tamén a 64 os doutras unidades --catro máis--, e na de Santiago e Barbanza, que conta cun paciente máis na UCI --tres en total-- e conta con 28 noutras unidades --seis máis--.

CASOS ACTIVOS Á BAIXA

Os casos activos de Covid rexistran un lixeiro descenso, con 16 infeccións menos, tras 37 xornadas consecutivas en ascenso, e sitúanse en 18.869, ao haber máis altas (1.184) que contaxios (1.171), ao que se suman tres falecementos.

Por áreas sanitarias, os casos activos descenden de novo na de Ourense (-114), que rexistra varios días consecutivos á baixa; á que se suma a de Santiago e Barbanza (-33) e Pontevedra e O Salnés (-16); mentres que no resto ascenden: A Coruña e Cee (+64); Vigo (+64), Lugo (+6) e Ferrol (+13).

Por tanto, con máis casos activos continúa a área de Vigo, con 4.539; seguida da da Coruña e Cee, con 3.827; Pontevedra e O Salnés, con 3.015; Santiago e Barbanza, con 2.324; Lugo, 2.218; Ourense, 1.983; e a de Ferrol segue á cola con menos dun milleiro, con 963.

MÁIS DE MIL CONTAXIOS NOVOS

Galicia chega ao final do mes de xullo por encima do milleiro de novos contaxios diarios desde fai xa once xornadas consecutivas, aínda que descenden lixeiramente --concretamente 22 contaxios menos que na xornada anterior, e sitúanse nos 1.171.

En Galicia foron confirmados 1.130 positivos por Probas Diagnósticas de Infección Activa (PDIA) no último día (que poden corresponder a casos activos doutras xornadas aos que se realiza unha nova proba diagnóstica), que supoñen 93 máis que o día anterior, dos cales 311 corresponden á área de Vigo; 240, á da Coruña e Cee; 168, á de Pontevedra e O Salnés; 123, á de Lugo; 129, á de Santiago e Barbanza; 100, á de Ourense; e 59, á de Ferrol.

Así, os contaxiados de Covid-19 desde o inicio da pandemia ascenden a 156.905, deles 36.279 na área da Coruña e Cee; 31.994 na de Vigo; 23.614 na de Santiago e Barbanza; 19.650 na de Ourense; 19.128 na de Pontevedra e O Salnés; 16.200 na de Lugo; e 10.040 na de Ferrol. Galicia levou a cabo desde o inicio desta pandemia 2.561.088 PCR, que implican 8.550 máis que as rexistradas ata a xornada anterior.

En canto á taxa de positividade das PCR, vén de subir a un 12,11% tras caer a un 11% a xornada anterior, despois de manterse as dúas xornadas previas nun 13,4% e iniciar esta semana cun repunte a un 15 por cento. Así, a Comunidade galega segue por encima dese 5% que establece a OMS para dar por controlada a pandemia, un limiar que, ata fai tres semanas, non superaba desde o 15 de febreiro.

VÍTIMAS E CURADOS

As persoas falecidas diagnosticadas con Covid-19 en Galicia desde o inicio desta pandemia ascenden a 2.460 despois de notificar este venres Sanidade tres novos falecementos. Segundo a información remitida aos medios por Sanidade, un home e unha muller, ambos de 88 anos de idade, faleceron no Complexo Hospitalario de Pontevedra (CHOP), mentres que outra muller de 92 anos morreu no Complexo Hospitalario Universitario da Coruña (Chuac). Todos tiñan patoloxías previas.

Pola súa banda, 135.602 pacientes curáronse deste coronavirus no conxunto de Galicia desde o inicio desta crise sanitaria, que constitúen 1.184 persoas máis que as rexistradas ata o día anterior.

Un grupo de persoas pasea polo recinto onde se adoita celebrar a Festa do Albariño, a 28 de xullo de 2021, en Cambados, Pontevedra.. Beatriz Ciscar - Europa Press | Fonte: Europa Press