A Xunta, de recortar a educación do rural a pedir "equilibrio" ao Goberno no seu reparto de fondos

O Goberno galego e 75 concellos impulsaron unha declaración institucional para conseguir un rural "forte e conectado" durante o encontro 'Netx Generation Galicia. Por un rural forte e conectado', que tivo lugar este sábado. As demandas centráronse en pedir ao Goberno central "equilibrio" na repartición dos fondos europeos en materia de mobilidade; unha circunstancia que choca coas novas de recortes en escolas rurais por parte da Consellería de Educación, como publicou Galicia Confidencial. 

Segundo informou a Xunta nun comunicado, a esta reunión asistiron a conselleira de Infraestruturas e Mobilidade, Ethel Vázquez; a directora xeral da Administración Local, Natalia Prieto; e os delegados da Xunta na Coruña, Gonzalo Trenor; en Lugo, Javier Arias; en Ourense, Gabriel Alén; e en Pontevedra, Luís López, ademais de representantes municipais.

Así, as peticións producíronse tras o malestar dun 98% dos municipios galegos, de acordo con cifras da Xunta, que quedan excluídos do plan europeo de recuperación por contar con menos de 50.000 habitantes.

Neste sentido, a conselleira lamentou que desde o Goberno se reserven o 78% dos recursos europeos destinados a mobilidade para actuacións propias e só se destine ás autonomías e aos municipios un 9% e un 13%, respectivamente.

O presidente da Xunta de Galicia, Alberto Núñez Feijóo, á súa chegada ao Convento de San Esteban para celebrar a XXIV Conferencia de Presidentes.. Manuel Laya - Europa Press