Galicia recibe 828,38 millóns do 'Fondo Covid' para 2021

Andalucía, Cataluña e Madrid, as autonomías que máis diñeiro recibirán do total.

Por Europa Press / Redacción | Santiago de Compostela | 03/08/2021 | Actualizada ás 15:27

Comparte esta noticia

O Consello de Ministros deu luz verde este martes ao decreto que recolle a distribución dos 13.486 millóns de euros que o Goberno prometeu ás comunidades autónomas para compensar os efectos da crise do coronavirus neste ano 2021, sendo Andalucía, Cataluña e Madrid as autonomías que máis diñeiro recibirán do total. Tras elas sitúanse Valencia e Galicia, que recibirá 828,38 millóns.

(E-D) A vicepresidenta terceira e ministra para a Transición Ecolóxica e o Reto Demográfico, Teresa Ribera, e a ministra Portavoz, Isabel Rodríguez
(E-D) A vicepresidenta terceira e ministra para a Transición Ecolóxica e o Reto Demográfico, Teresa Ribera, e a ministra Portavoz, Isabel Rodríguez | Fonte: R.Rubio. POOL - Europa Press.

En concreto, Andalucía levará este ano 2.357,50 millóns de euros; Cataluña recibirá 2.160,99 millóns de euros e a comunidade presidida por Isabel Díaz Ayuso obterá 1.863,76 millóns de euros.

Esta repartición entre as comunidades autónomas efectuouse segundo a poboación axustada, tal e como anunciou o Goberno que se faría tras telo comunicado aos executivos autonómicos a semana pasada no Consello de Política Fiscal e Financeira (CPFF).

O Ministerio de Facenda defende que este criterio é o que defenden a maioría de gobernos autonómicos, aínda que algúns, como Cataluña ou a Comunidade de Madrid, pedían que o criterio que primase nesta repartición fose o Produto Interior Bruto (PIB).

En calquera caso, tras Andalucía, Cataluña e Madrid, que suman o 47% do total deste fondo, sitúanse a Comunidade Valenciana (1.400 millóns); Galicia (828,38 millóns); Castela e León (741,26 millóns); País Vasco (644,5 millóns); Canarias (629 millóns); Castela-A Mancha (605,3 millóns); Murcia (421,9 millóns); Aragón (402,5 millóns); Baleares (329,7 millóns); Estremadura (317,8 millóns); Asturias (308,3 millóns); Navarra (192,9 millóns); Cantabria (168,3 millóns); A Rioxa (93,5 millóns) e Ceuta e Melilla (10 millóns).

O 70% EN SETEMBRO, E O RESTO EN NOVEMBRO

O decreto deste Fondo Covid, que está recollido nos Orzamentos Xerais do Estado para o ano 2021, contempla que os 13.486 millóns transferiranse en dúas fases. Así, o 70% destes recursos trasladaranse en setembro e o 30% restante no mes de novembro deste ano.

Xa o ano pasado o Executivo central mobilizou un Fondo Covid de 16.000 millóns de euros para repartir entre as comunidades autónomas e, agora, volve outorgar aos gobernos autonómicos un novo fondo, esta vez con asignación aos orzamentos do Estado.

Ademais, para o próximo ano, Facenda xa comunicou que as entregas a conta do sistema de financiamento alcanzarán a cota inédita dos 112.213 millóns de euros, un 6,3% máis.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta