Por Europa Press / Redacción | Santiago de Compostela | 04/08/2021 | Actualizada ás 15:00
O presidente da Xunta, Alberto Núñez Feijóo, anunciou que, tras fixar as necesidades de doses para as repescas, Galicia abrirá de inmediato ata 25.000 autocitas máis para mozos de entre 16 e 22 anos, franxa de idade na que se rexistra "un incremento moi importante" de contaxios no marco da pandemia.
Feijóo tamén ratificou que nos próximos días chegarase de forma xeral vacinando á poboación de 22 ou 23 anos (o proceso de inmunización en Galicia avanza, conforme o ritmo de cada área sanitaria, na franxa etaria de 29 cara abaixo).
"E nos próximos días imos abrir un número de ata 25.000 autocitas a mozos de entre 16 e 22 anos. Abrirémolo nos próximos días e anunciarémolo con antelación para seguir incorporando os mozos con incidencia máis alta. Espero que estas 25.000 citas as podamos implementar a finais desta semana para poder empezar a próxima coa vacinación de entre 22, 21 e 20 anos", dixo Feijóo.
Aínda que inicialmente concretou que esas autocitas poderían beneficiar especialmente a mozos "con maior necesidade", que teñan que realizar viaxes de estudos ou saídas de Galicia, precisou que poderán acceder a elas o conxunto da poboación de entre 16 e 22 anos..
EN PARALELO, CITACIÓN 'FORZADA'
En canto a quen non consigan cita por esta vía, precisou que se continuará coa chamada 'forzada' desde o Servizo Galego de Saúde (Sergas) por orde cronolóxica de idade.
Previamente, na pasada xornada, o conselleiro de Sanidade, Julio García Comesaña, avanzara nunha comparecencia parlamentaria que en Galicia se citaría esta semana a 135.000 persoas para vacinarse entre o 2 e o 8 de agosto, deles 5.900 serían repescas para maiores de 40 anos que non recibisen a pauta ata a data.
"SENSACIÓN FALSA DE SEGURIDADE"
Ademais, no caso dos mozos, tras incidir no "incremento moi importante" de novos contaxios na franxa de 16 a 22 anos, ligou esta situación a "certa sensación falsa de seguridade" neste colectivo, sobre todo porque teñen aos familiares de maior idade (pais, avós ou irmáns, citou) xa inmunizados.
Neste punto, volveu a alertar do impacto da variante delta --na que basta "un contacto de segundos" para contaxiarse-- e engadiu, ademais, que os expertos auguran que, dado que o virus segue mutando, haberá novas variantes que poden ser aínda "máis agresivas".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.