A Xunta contará cun Comité clínico de cirurxía robótica para deseñar os protocolos de uso dos robots Da Vinci
O objetivo do comité é deseñar os criterios e protocolos de utilización.
Por Europa Press / Redacción | SANTIAGO DE COMPOSTELA | 06/08/2021 | Actualizada ás 17:39
A Xunta contará cun Comité clínico de cirurxía robótica para a "normalización, coordinación e seguimento da utilización" dos robots cirúrxicos Da Vinci, co fin de deseñar os criterios e protocolos de utilización.
Así o informou a Consellería de Sanidade nun comunicado, no que explica que o proxecto da orde que o creará comezou este venres a súa tramitación administrativa "para regular a súa natureza xurídica e adscrición, composición, funcións e réxime de funcionamento e coordinación".
Segundo este proxecto, este comité estará integrado por 18 persoas, entre as que haberá representantes de cada unha das áreas cirúrxicas susceptibles de realizar a maior parte da actividade con este equipamento.
O "principal labor" deste comité, destaca Sanidade, "será deseñar os criterios e protocolos de utilización destes sistemas robóticos para garantir un desenvolvemento progresivo e homoxéneo no emprego desta tecnoloxía en todo o Servizo Galego de Saúde".
HOSPITAL PROVINCIAL DE PONTEVEDRA
Por outra banda, a área Sanitaria de Pontevedra e O Salnés informou de que o Hospital Provincial investiu máis de 100.000 euros nun plan de melloras e humanización para a área de hospitalización da unidade de Coidados Paliativos emprazada na primeira planta do Hospital Provincial.
Cun prazo de execución técnica dun mes, terminou este venres co ingreso gradual de pacientes nalgunhas habitacións da área renovada, destacaron as mesmas fontes sanitarias.
