A web do Sergas colapsa pola avalancha de solicitudes de autocita para a vacinación de menores de 20 anos

A páxina web do Sergas colapsou esta mañá ante a avalancha de solicitudes de autocita para a vacinación dos menores de 20 anos, para os que se habilitaban a partir deste sábado 25.000 prazas.

As 25.000 autocitas que Sanidade habilitara para a vacinación dos mozos nados entre o 2000 e 2005 este sábado, esgotáronse á primeira hora da tarde tras colpasar a páxina web do Sergas durante gran parte da mañá.

A web, onde ademais das autocitas, están dispoñibles todos os datos a nivel autonómico sobre a pandemia, notificoulle 'erro no servizo' a aquel que quixese pedir quenda para a vacina, para, posteriormente, denegar o acceso á páxina en si.

Sanidade confirmou que o fallo no sistema débese ao "elevadísimo volume de entradas" e a que todas ocorreron "a primeira hora", aínda que aínda non confirmaron cando podería volver accederse á web.

O grupo dos máis novos avanza no proceso de vacinación ao sumarse os menores de 20 anos, para os que está dispoñible a autocita a partir deste sábado, ao grupo de 20 a 29 anos, cuxa vacinación comezou nas últimas semanas e que este venres xa excedían o 40% con polo menos unha dose.

SOLICITUDES NAS PRIMEIRAS HORAS

O vicepresidente primeiro da Xunta, Alfonso Rueda, celebrou o "especial interese" que os mozos galegos están a mostrar por vacinarse, á vez que pediu desculpas "polas molestias" que puidese ocasionar o colapso na web do Sergas rexistrado nas primeiras horas de apertura das autocitas para nados entre os anos 2000 e 2005.

As prazas esgotáronse tras a posta en marcha dun plan de continxencia co fin de "aliviar o tráfico na rede pola elevada demanda". Ademais, destacaron que a programación destas autocitas fíxose en fin de semana "para evitar a repercusión nos sistemas asistenciais".

As autoriades sanitarias galegas informaron de que se chegaron a xestionar ao redor de 300 citas cada dez minutos e houbo un pico de 1,6 millóns de solicitudes --por persoas que reiteraron varias veces a petición--.

Preguntado respecto diso nun acto en Santiago, o vicepresidente Rueda aludiu ao "elevadísimo número" de peticións que colapsaron o sistema e pediu desculpas por iso, pero tamén apuntou que se trata dun "magnífico síntoma" que evidencia o interese do colectivo máis novo en inmunizarse.

"Imos atender, mediante este sistema, a todos canto nos sexa posible sen descoidar o sistema de vacinación por idade, co que a Xunta mantén o criterio e é o máis conveniente", explicou Rueda, en declaracións aos medios.

PETICIÓN DE MÁIS VACINAS

Finalmente, aproveitou para insistir na petición de que haxa máis vacinas e pediu que as de Pfizer que o presidente do Goberno, Pedro Sánchez, anunciou no cume de presidentes de Salamanca, cheguen "canto antes".

De feito, lembrou que Galicia ten "menos" doses que hai unhas semanas e "a capacidade de administrar moitas máis".