Baltar defende en Linz a capacidade organizativa de Ourense para acoller a Coupe da Jeunesse de remo

A "decidida aposta" pola promoción internacional das láminas de auga do río Miño para o deporte do remo, as novas instalacións das que se disporá para a práctica desta modalidade deportiva, a estratéxica situación da provincia en materia de comunicacións, a dispoñibilidade de prazas hoteleiras e o "elevado interese turístico" do territorio constitúen os eixos da candidatura que o presidente da Deputación de Ourense, Manuel Baltar, defendeu en Linz (Austria) para que o Parque Náutico de Castrelo de Miño acolla a principios de agosto de 2022 a máis prestixiosa proba internacional de remo a Coupe da Jeunesse.

Manuel Baltar encabezou a delegación que esta fin de semana acudiu á localidade austríaca, onde se está celebrando a regata de 2021 coa participación de máis de 500 deportistas en representación de 16 países.

Unha visita, destacou Baltar, que "permite coñecer en directo e en detalle" a organización e desenvolvemento da proba, pero sobre todo demostrar o interese que Ourense ten en acoller a próxima edición.

Ante os máximos dirixentes da Coupe da Jeunesse, que fixeron unha moi positiva valoración da candidatura ourensá, o presidente provincial defendeu a capacidade organizativa e o compromiso da Deputación de Ourense co Parque Náutico de Castrelo de Miño, onde en colaboración co concello e coas federacións galega e nacional, está a situarse este espazo como "escenario perfecto para a práctica do remo e do piragüismo".

Baltar salientou que o río Miño e tanto as instalacións de Castrelo como de Laias e Arnoia, "foron escollidas polas mellores seleccións nacionais para preparar nas láminas de auga os diferentes campionatos internacionais e mesmo as Olimpíadas".