Interceptan seis polisóns no porto de Ferrol relacionados cunha mafia albanesa

CCOO do porto de Ferrol asegura que Galicia segue "sendo a única Comunidade Autónoma onde a Policía Portuaria dos seus portos de interese xeral non ten nin defensa, nin grilletes, nin formación adecuada para este tipo de situacións".

Por E.P. | SANTIAGO DE COMPOSTELA | 09/08/2021 | Actualizada ás 16:57

Comparte esta noticia

A Policía Portuaria interceptou a seis polisóns nun buque no Porto de Ferrol vinculados cunha mafia albanesa no norte de España que pasa persoas de maneira ilegal ao Reino Unido, o que motivou de novo a denuncia de falta de axentes e medios fronte a estas situacións.

Así, por parte da Sección Sindical de CCOO do Porto de Ferrol comentaron a Europa Press que teñen "un problema cunha mafia albanesa asentada no norte de España" que antes "só utilizaba o porto de Santander e o de Bilbao para pasar ao Reino Unido", pero agora "atópanse que en Ferrol apenas" teñen "efectivos para cubrir todas as responsabilidades e funcións".

Neste sentido, por parte da Sección Sindical de CCOO do Porto de Ferrol, o seu secretario xeral, Francisco José Pena Varela, asegurou que "xa levan moitos intentos e nalgún caso conseguírono" porque non dan abasto ao non ter "nin persoal, nin medios". Así, comentaron que Galicia segue "sendo a única Comunidade Autónoma onde a Policía Portuaria dos seus portos de interese xeral non ten nin defensa, nin grilletes, nin formación adecuada para este tipo de situacións".

Aínda que, "normalmente tentan" pasar de noite, na tarde deste domingo trataron de introducir en Ferrol  seis polisóns, que foron interceptados por un axente portuario que estaba a pé do buque onde os localizaron.

Mentres, o axente que estaba na torre de control do Centro de Coordinación de Servizos foi o que avisou da presenza dos polisóns ás forzas e corpo de seguridade. Segundo destacaron fontes portuarias, "van collendo confianza e aumentarán a presión como fixeron noutros portos".

Por iso, por parte da Sección Sindical de CCOO do Porto de Ferrol, Francisco José Pena Varela reclama á empresa "máis axentes e medios". "Temos un problema que se non se atalla pronto se enquistará e volverase perigoso", advirte.

O Porto de Ferrol . AUTORIDADE PORTUARIA DE FERROL
O Porto de Ferrol . AUTORIDADE PORTUARIA DE FERROL

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta