O prezo dos alugueres descende un 0,3% en xullo en Galicia
Segundo os datos do Índice Inmobiliario Fotocasa, Galicia rexistrou unha suba dos prezos das vivendas en aluguer con respecto ao mesmo período do 2020.
Por E.P. | SANTIAGO DE COMPOSTELA | 10/08/2021 | Actualizada ás 13:46
En Galicia o prezo da vivenda en aluguer descende un 0,3% en xullo na súa variación mensual e sobe un 3,2% na súa variación interanual, segundo os datos do Índice Inmobiliario Fotocasa.
A nivel estatal, o prezo da vivenda en aluguer mantense na súa variación mensual, pero descende un 2,7% en taxa interanual, ata os 10,44 euros o metro cadrado no mes en xullo. É o sexto descenso rexistrado desde febreiro de 2021 (-1,7%).
No entanto, hai trece comunidades que presentan datos mensuais positivos en xullo. Así, as comunidades de Estremadura e Cantabria, cun incremento dun 3,1% e un 2,9%, respectivamente, son as rexións que máis soben de prezo. En canto ás CCAA máis caras para alugar unha vivenda en España, Madrid e Cataluña, 13,84 euros o metro cadrado ao mes e 13,79 euros, respectivamente, son as que teñen o prezo máis alto; mentres que as máis económicas son Castela-A Mancha con 6,01 euros, e Estremadura con 5,72 euros o metro cadrado ao mes.
O prezo do aluguer sobe en xullo respecto de xuño en 26 das 48 provincias analizadas (54%) por Fotocasa. Lugo é a segunda provincia cun incremento mensual máis alto (4,3%), só por detrás de Xaén (4,7%). Pola contra, as provincias que presentan descensos máis acentuados son Zamora (-6,4%), Navarra (-4,4%) e Palencia (-2,9%).
