Yolanda Díaz ve necesario "intervir nos prezos da enerxía e regulalos"
A vicepresidenta Segunda do Goberno e ministra de Traballo e Economía Social, Yolanda Díaz, declara que a "a luz é un dereito fundamental".
Por Europa Press / Redacción | MADRID | 14/08/2021 | Actualizada ás 12:50
A vicepresidenta Segunda do Goberno e ministra de Traballo e Economía Social, Yolanda Díaz, apostou por "intervir nos prezos da enerxía e regulalos". "Temos que intervir nos prezos da enerxía e regulalos, a luz é un dereito fundamental", sinalou Díaz nunha entrevista publicada por Ctxt.
Neste contexto, asegurou que no Goberno falan de cal é a situación do país e que son "perfectamente conscientes da difícil situación pola que están a pasar miles e miles de familias". En concreto, fixo referencia ao prezo da luz, os carburantes, a dificultade para acceder a unha vivenda ou a precariedade laboral.
"Son problemas estruturais e herdados que afectan ao día a día da cidadanía. E este Goberno ten a obrigación de darlles resposta", subliñou Díaz, destacando que o prezo da luz é un dos temas que máis lle preocupa e que a situación "xa clama ao ceo".
Para a vicepresidenta Segunda do Goberno, a subida do prezo da luz é o resultado de "un proceso de privatizacións do sector eléctrico que se vendeu como unha modernización do país, que supostamente beneficiaría aos usuarios". "E no que acabou é nun oligopolio con prezos multiplicados cada ano", criticou.
Sobre a situación a día de hoxe, a ministra resaltou que, á marxe das medidas que xa puxeron en marcha desde o Goberno e que deberían "quedar de forma permanente" como a redución do IVE, "é o momento de ser valentes".
Así, Díaz explicou que España é un país "dependente energéticamente" polo que "non se pode comparar con outros modelos europeos": "Xustamente por isto hai que intervir no prezo da enerxía e camiñar cara aos prezos regulados".
"Hai que pensar en grande, non en ir tirando. Para min cada minuto no Goberno é un minuto para seguir avanzando en dereitos. Son tallante: debemos ser valentes e despregar a axenda social para reducir a desigualdade, é o que a xente espera de nós e por isto avaliarannos", sentenciou.
