Declaran extinguido o incendio de Rubiá
A Consellería apuntou ademais que, "tras os pertinentes traballos de comprobación sobre o terreo", a Unidade de Investigación de Incendios Forestais (UIFO) puido determinar que a suposta causa do lume foi unha cabicha mal apagada.
- Unha cabicha mal apagada, orixe do incendio de Rubiá
- Controlado o incendio no Concello de Rubiá que xa afectou a 200 hectáreas
Por Europa Press / Redacción | SANTIAGO DE COMPOSTELA | 15/08/2021 | Actualizada ás 10:55
O incendio orixinado no concello de Rubiá o pasado xoves foi extinguido ao redor das 20,27 horas deste sábado, tal e como informou a Consellería de Medio Rural nun comunicado.
Segundo as últimas medicións do departamento da Xunta, o lume afectou a unha superficie de 205 hectáreas, das que 190 son arboredo e o resto de monte raso.
No control do incendio participaron catro técnicos, 19 axentes, 43 brigadas, 20 motobombas, tres pas, nove avións e 10 helicópteros.
A Consellería apuntou ademais que, "tras os pertinentes traballos de comprobación sobre o terreo", a Unidade de Investigación de Incendios Forestais (UIFO) --creada esta tempada pola Xunta-- puido determinar que a suposta causa do lume foi unha cabicha mal apagada.
Medio Rural destaca que se traballa na investigación completa, xunto ao Servizo de Protección da Natureza (Seprona) da Garda Civil de Ourense, para verificar a procedencia dese elemento mediante a proba de ADN e, a partir de aí, continuar coas dilixencias oportunas.
