Gonzalo Caballero acusa a rebaixa das peaxes nas autoestradas autonómicas de "irrisoria" e "insuficiente"

O secretario xeral do PSdeG, Gonzalo Caballero, tachou de "irrisoria" e "insuficiente" a rebaixa das peaxes nas autoestradas autonómicas AG-55 e AG-57, "xa que só beneficia a familias numerosas", co que "exclúe a gran parte da poboación galega".

Caballero criticou o "cinismo" do presidente da Xunta de Galicia, Alberto Núñez Feijóo, ao anunciar "ao grande" unha bonificación destinada "a un sector da poboación moi concreto" e que "só se pode gozar de luns a venres, ademais".

O líder dos socialistas galegos contrapuxo as rebaixas nas autoestradas de propiedade autonómica ás bonificacións nas estatais, "que suporán 2.300 millóns de euros ata o ano 2048 e das que poden beneficiarse todos os galegos, todos os días da semana". Así, Caballero censurou que o responsable autonómico cualificase as rebaixas do Goberno de Sánchez de "insuficientes".

"Cando o Goberno de España sacou adiante a rebaixa histórica da AP-9, Feijóo anunciou que rebaixaría as peaxes das autoestradas galegas da Xunta, pero só foi mercadotecnia, un anuncio de botafumeiro", aseverou Caballero, que destacou ademais que o plan de bonificacións vence en 2023, o que para o líder socialista "reflicte a falta de vontade do Goberno galego".

Gonzalo Caballero tamén criticou o "papeleo" que hai que realizar para poder gozar dos descontos, xa que as familias numerosas que queiran acollerse á bonificación, terán que darse de alta nun rexistro en liña habilitado pola concesionaria, "o que provoca que, a día de hoxe, só o gocen 40 familias", segundo os datos achegados polo PSdeG nun comunicado.

Así as cousas, o dirixente socialista instou ao Executivo autonómico a "levantar as peaxes das autoestradas galegas" en Valmiñor e en Carballo, "xa que hai fondos para poder facelo".

O secretario xeral do PSdeG, Gonzalo Caballero, nunha rolda de prensa nas instalacións do grupo socialista no Parlamento de Galicia.. PSDEG-PSOE | Fonte: Europa Press