UGT denuncia a supresión de unidades en centros educativos galegos e anuncia o seu apoio ás mobilizacións

UGT denunciou a situación que viven as comunidades educativas dalgúns centros galegos, que tacharon de "dramática", polo anuncio, "en pleno mes de agosto", da supresión de unidades en relación ao curso pasado.

O sindicato lamentou, primeiro, que se eliminen en si as unidades, "nun contexto aínda marcado pola pandemia, en plena quinta onda", e segundo, que o anuncio por parte da Consellería de Educación se faga no mes de agosto, "coincidindo coa ausencia da comunidade educativa, fóra dos centros, e sen marxe de manobra".

É por este motivo que UGT mostrou o seu apoio á convocatoria da ANPA do Colexio de Calo (Teo) para este venres 20 de agosto diante de Educación, en Santiago de Compostela, onde denunciarán a supresión dunha liña en cuarto curso, "levando á masificación e ao límite aos dous restantes, e todo isto a pesar de contar con máis dun 10% de alumnos con necesidades especiais".

O sindicato, que cualificou as medidas como "unha temeridade", insistiu no seu rexeitamento ao protocolo presentado pola Consellería para o curso 2021-2022 e volveu pedir unha "prórroga" das medidas de apoio que se puxeron en marcha o pasado curso pola covid-19, "tanto desde o punto de vista material como en canto a recursos humanos".