Por GC Tendencias | Compostela | 17/01/2014 | Actualizada ás 11:53
A Casa das Crechas acolle este venres ás 20h a presentación do filme ‘Carga de dignidade’, unha peza documental de 27 minutos realizada por Xosé Bocixa que explica o proxecto e recolle a acción ‘Carga de dignidade’ que tivo lugar en Ferrol o ano pasado.
O documental recolle os feitos que tiveron lugar o pasado 2 de xuño cando unha acción unitaria, insólita en Ferrol, conseguiu que varios milleiros de persoas se achegaran á reixa de Navantia para pendurar unha peza de roupa.
Seguindo o exemplo dos buzos de traballo que os despedidos tiñan espetado nos ferros que cercan a factoría, os cidadáns de Ferrol conseguiron encher con roupa máis dun quilómetro de valado nunha acción reivindicativa polo naval que se converteu en artística.
Durante a acción, Radio Buguina emitiu un programa de radio con varias entrevistas e a música ao vivo de Mercedes Peón, María Manuela e moitos máis. A día de hoxe a reixa segue viva, coas pezas de roupa aínda penduradas e degradadas polo paso do tempo.
Foi unha acción artística popular convocada polo colectivo de creadores Radio Buguina co apoio de máis de 30 organizacións de Ferrolterra.
O filme será presentado en Compostela polo seu director, Xosé Bocixa, ademais de por varios membros de Radio Buguina: o escritor Suso de Toro, Xurxo Souto, o escultor Pepe Galán, o profesor Anxo Varela e o deseñador Pepe Barro.
Velaquí o trailer:
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.