O BNG recupera a Guillerme Vázquez para a Fundación Galiza Sempre
Haberá unha remoderación "máis grande" deste órgano que afectará ao seu Padroado. O ex voceiro nacional substituirá na Presidencia a Xesús Veiga.
Por Galicia Confidencial | Compostela | 16/01/2014 | Actualizada ás 08:00
O que foi voceiro nacional do BNG desde 2009 ata a primavera do pasado ano, Guillerme Vázquez, volve ao primeiro plano político. E o fará para presidir a Fundación Galiza Sempre que, ata agora, presidía o ex parlamentario e veterano político Xesús Veiga e na que estivo, ata que abandonou o BNG, Xosé Manuel Beiras.
A decisión xa foi adoptada pola Executiva do BNG en novembro do pasado ano, pero será estes días cando se dea a coñecer públicamente. Segundo as fontes consultadas por GC, foi a UPG a que plantexou este cambio que foi aprobado por unanimidade.
Sen embargo, o novo portavoz nacional, Xavier Vence, en declaracións a GC, suliñou que a mudanza na Presidencia da fundación é parte dunha remodelación "máis grande" que afectará a todo o seu Padroado e que se dará a coñecer "nos vindeiros días".
Da man da APU
Guillerme Vázquez volve, deste xeito, a un posto de relevancia pública logo do seu paso pola Portavocía Nacional á que chegou aupado pola plataforma Alternativa pola Unidade (APU), que liderou a UPG na asemblea do 2009. A mesma alternativa volveu a propoñelo como portavoz na traumática Asemblea Nacional de Amio de 2011, da que volveu saír reelexido por estreito marxe e que, finalmente, acabou na ruptura do BNG.
Segundo as fontes consultadas, un dos argumentos esgrimidos pola UPG para botar man do ex deputado no Parlamento galego e no Congreso foi en recoñecemento o seu labor como portavoz nacional. Antes ca el, tamén Xosé Manuel Beiras recalou no mesmo cargo.
Con todo, e a pesares de estar na mesma situación que Beiras ou Vázquez, Anxo Quintana non tivo ese recoñecemento logo de liderar o BNG desde o 2003 ata o 2009 e chegar ao máximo posto institucional que tivo nunca un dirixente do BNG, a Vicepresidencia da Xunta.
Sen representación de Abrente
Guillerme Vázquez substituirá a Xesús Veiga, ex lider de Inzar e unha das cabezas visibles do movemento Abrente --antes Máis Galiza--. Deste xeito, este grupo queda sen ningunha representación nos altos postos de representación do BNG, xa que tampouco están na Executiva, a pesares de que os seus membros sosteñen a maior parte das alcaldías do Bloque.
Con todo, non só mudará a Presidencia. Tamén haberá cambios no Padroado coa chegada de novas persoas, "algúns deles, rostros coñecidos da cultura galega que non militan no BNG", aseguran as fontes consultadas.
