Música e gastronomía a bordo: volve unhas das experiencias máis populares do Festival Revenidas
O festival de Vilaxoán de Arousa ofrecerá de novo os seus Concertos a bordo, despois de dous anos de parón.
Por Galicia Confidencial | SANTIAGO | 26/08/2021 | Actualizada ás 13:50
Os Concertos a bordo, unha das experiencias máis reclamadas do Festival Revenidas, volverán a ofertarse o 11 e 12 de setembro. Despois de dous anos sen organizar esta actividade, o festival de Vilaxoán de Arousa botará a navegar o Chasula, unha embarcación tradicional na que os asistentes poderán gozar de música ao vivo e degustar produtos gastronómicos galegos.
Pauliña, Dakidarría, Xiana e Andrea (da Banda da Loba), Jásper e Nébeda, Sofía Espiñeira e Leo e Arremecaghonaconá serán os seis grupos que subirán a bordo do Chasula. En total, 3 saídas o sábado 11 e outras 3 o domingo 12.
Trátase de concertos íntimos e exclusivos, nos que o aforo será de 10 persoas, cumprindo en todo momento as medidas sanitarias correspondentes.
As entradas para asistir poderán adquirirse a partir deste venres 27 ás 12.00 horas na páxina web do Festival Revenidas, por un prezo de 20 euros máis gastos de xestión. Para os menores, o prezo será de 12 euros.
