Por Europa Press / Redacción | SANTIAGO DE COMPOSTELA | 28/08/2021 | Actualizada ás 13:52
Galicia alcanzou os 1,7 millóns de certificados COVID expedidos pola Xunta, a maior parte deles vinculados ao cumprimento do proceso de vacinación contra o coronavirus.
Exactamente, o Servizo Galego de Saúde (SERGAS), expediu un total de 1.711.693 certificados COVID que se desagregan da seguinte maneira: 1.649.118 certificados corresponden ao propio proceso de vacinación; 38.442 certificados de resultado de proba diagnóstica; e os 24.133 restantes vinculados á superación da enfermidade.
Nun comunicado, o Executivo autonómico defendeu que "afrontou a nova onda con solucións innovadoras, axustadas á situación epidemiolóxica actual".
Entre as medidas ás que fai referencia, a Xunta destaca a instalación de puntos de test de antíxenos nos distintos distritos sanitarios e o sistema de rexistro dos resultados dos autotest nas oficinas de farmacia.
Tamén puxo en valor o acordo entre o Goberno galego e os Colexios Oficiais de Farmacéuticos de Galicia para que as oficinas de farmacia adheridas poidan acreditar a validez dos resultados das probas de autotest e integrar os seus resultados nos rexistros do sistema público de saúde, unha vez que o Executivo central aprobou a venda destas probas en farmacias.
A emisión deste tipo de certificados está dispoñible a través da app Sergas móbil, os puntos administrativos instalados nas áreas sanitarias, as oficinas de farmacia e a liña telefónica, na que se pode solicitar a emisión de certificados de vacinación con envío por SMS.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.