Comezou a vendima en Valdeorras
O Consello Regulador da D.O .Valdeorras, tras a reunión do venres 27 de agosto, aprobou as normas da vendima 2021 para vedores, adegas e explotadores. Valdesil será a primeira adega en iniciar os traballos.
Por X.M. Fernández | Vilamartín de Valdeorras | 30/08/2021 | Actualizada ás 11:21
Os traballos de recollida da uva iniciáronse en Valdeorras nesta derradeira fin de semana de agosto. A adega Valdesil foi a primeira, comezando xa o sábado 28.
Segundo sinalou o presidente do Consello Regulador, José Luis García Pando, Agárdase que a colleita sexa “óptima, tanto en cantidade coma en calidade”. O organismo agarda poder superar os 5,5 millóns de quilos de uva recollidos na pasada campaña nunha vendima que se estenderá, posiblemente, ata outubro.
O Pleno do Consello Regulador --reunido o pasado venres 27 de agosto en Vilamartín de Valdeorras-- acordou, coma en anos anteriores, a contratación de vedores para a vendima 2021 a través dunha empresa de traballo temporal. Xunto a iso, aprobou as normas para a vindeira campaña tanto para estes vedores, como para adegas e explotadores.
O organismo informa tamén que en tempo de vendima, en concreto entre o 15 de setembro e o 17 de outubro, suspenderanse as catas que, con regularidade, se realizan nas instalacións do Consello Regulador en Vilamartín de Valdeorras.
