Unha mesa abordará o éxito do "Galician Noir" no Celtic Media Festival

Unha mesa de debate abordará o éxito das producións englobadas baixo a etiqueta 'Galician Noir' no Celtic Media Festival, que se celebrará do 7 ao 9 de setembro de forma exclusivamente virtual. No coloquio participarán representantes dalgunhas das produtoras que fixeron dos thrillers ambientados en Galicia un dos xéneros que maior éxito están a cultivar en pantallas e plataformas de contidos.

A mesa contará coa participación do responsable de contidos da CRTVG, Fernando R. Ojea, que estará acompañado por Alfonso López (Portocabo), Mike Ellen (Freedom Scripted), Borja Pena (Vaca Films) e Ghaleb Jaber (CTV Produccións).

Ademais, a CRTVG conta con once candidaturas que optan ás distintas categorías dos premios deste festival, no que competirán con producións doutras corporacións europeas como a BBC.

Así, 'Os castros' está nomeada á sección de historia, 'Malicia noticias' en entretemento baseado en feitos reais, 'Desmontando Galicia' en televisión real, 'Un canto á vida' en entretemento e 'Aquelando na casa' en programación infantil. Tamén acoden como finalistas 'Ruta Amodiño' na cateogría de actualidade, 'Máis ca vida' en documental, 'Auga seca' en series e a película 'A illa das mentiras' en drama.

A novidade desta edición do Celtic Media Festival é a selección de programas da Radio Galega entre as candidaturas dos premios. 'Pensando en ti' e 'Convivir deportivo' optan a levar un dos galardóns nas categorías de producións radiofónicas.

'A illa das mentiras'.