Por Europa Press / Redacción | SANTIAGO DE COMPOSTELA | 31/08/2021 | Actualizada ás 17:55
O sindicato CCOO rexeitou o expediente de regulación de emprego (ERE) anunciado polo Banco Sabadell e alertou dun posible peche de máis oficinas da entidade en Galicia, onde "xa tiña previsto pechar 31".
Nun comunicado remitido aos medios, o sindicato sinala que, aínda que o banco non comunicou polo momento o alcance desta regulación de emprego, a organización "non llo porá fácil" e manterá "unha firme defensa do emprego".
Así mesmo, lembra que o Banco Sabadell emprega en Galicia a 428 persoas que traballan en 98 oficinas. Con todo, sinala que antes de anunciar o ERE xa estaba previsto o peche de 31 destes centros de traballo polo que alerta de que esta regulación de emprego "podería implicar o fin de máis oficinas e agravar a carencia de servizos financeiros en numerosos concellos galegos".
CCOO-Servizos considera que "non concorren causas que xustifiquen o despedimento colectivo". Así, apunta que, no que vai de ano e pese ao axuste de 1.800 empregos no primeiro trimestre --40 en Galicia-- entre prexubilacións e saídas voluntarias, a entidade "xa fixo máis de 200 novas contratacións en todo o Estado. "Sinal de que non sobra nada", apunta o sindicato.
Nesta liña, sostén que tampouco hai causas económicas que o xustifiquen tendo en conta que o Sabadell "pechou o primeiro semestre do ano cun beneficio neto atribuído de 220 millóns de euros e prevé pagar un dividendo do 30% do beneficio". Ademais, considera que tampouco hai razóns técnicas ou produtivas nin organizativas que se poidan aducir.
Por todo iso, avanzou que rexeitará calquera medida "traumática" en materia de emprego e reclama que calquera saída sexa voluntaria a través de prexubilacións anticipadas e xubilacións.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.