Por E.P. | SANTIAGO DE COMPOSTELA | 01/09/2021 | Actualizada ás 16:25
A falta de materias primas, unha crise de carácter internacional, obrigou a paralizar as obras de reforma da Estación de Autobuses de Pontevedra xusto o día no que entrou en funcionamento o novo acceso a este recinto desde a avenida de Josefina Arruti.
A conselleira de Infraestruturas e Mobilidade, Ethel Vázquez, xunto co alcalde de Pontevedra, Miguel Anxo Fernández Lores, asistiu este mércores á posta en servizo deste novo viario, nun acto no que estiveron acompañados polo delegado territorial da Xunta, Luís López; o director xeral de Mobilidade, Ignacio Mestre; e os concelleiros César Mosquera e Demetrio Gómez.
Na súa intervención, Ethel Vázquez destacou o novo acceso á estación de autobuses como a "peza clave da intermodal de Pontevedra" e avanzou que o próximo outubro estará concluído o novo espazo público, "de gran valor ambiental", ao redor do río Gafos.
Con todo, no mellor dos casos, á reforma interior do edificio aínda lle faltarían dous meses de obras unha vez que se poida retomar o traballo. O alcalde de Pontevedra restoulle importancia a esta demora e destacou que "o importante" é que as administracións cheguen a acordos para facer proxectos, como ocorreu neste caso.
Vázquez Mourelle incidiu en que a posta en servizo do acceso desde a avenida de Josefina Arruti libera o tránsito de autobuses de cálea Estación e mellora o itinerario peonil de conexión coa estación de tren.
Este acceso contribúe a xerar unha gran praza na entrada da estación, na que se reordenan os aparcadoiros e desde a que se accede á terminal de Renfe. Ademais, esta apertura permite liberar os marcos do encanamento do río Gafos e destapalo, gañando un espazo público de valor ambiental para a cidade.
GRAN MONTECELO
No acto, Ethel Vázquez aclarou que a falta de materias primas non está a afectar ás obras de construción do hospital Gran Montecelo.
A conselleira detallou que esta obra inicia este mes os traballos de cimentación e que tamén haberá algunhas voaduras de roca atopada no terreo. Ademais, haberá que desviar unha condución de gas que atravesa o terreo da obra. Segundo confirmou a conselleira, a actuación avanza sen contratempos e nos prazos establecidos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.