Os contaxios volven superar os 300 casos covid
A presión hospitalaria cae lentamente, con dous pacientes menos e, por áreas, sobe en tres, baixa noutras tantas e se estanca nunha, Ferrol.
Por Europa Press / Redacción | Compostela | 02/09/2021 | Actualizada ás 11:48
Os datos de evolución da covid publicados este xoves pola Consellería de Sanidade reflicten que continúa a evolución positiva da pandemia en Galicia, posto que melloran todos os indicadores. Aínda que os novos contaxios volven estar por encima dos 300, seguen moi por baixo da media de casos da quinta onda. Ademais, a taxa de positividade das PCR (o número de positivos por cada 100 probas realizadas) continúa sendo inferior ao límite do 5% que marca a OMS para dar por controlada a pandemia.
Ademais, as infeccións activas continúan á baixa, con 293 negativos máis nas últimas 24 horas, e a presión hospitalaria prosegue lentamente na liña de alivio que viña marcando nos últimos días, con catro pacientes menos ingresados por covid nos hospitais galegos. Así, segundo eses datos (que reflicten información solicitada ata as 18,00 horas do mércores), nas últimas 24 horas rexistráronse 334 novos contaxios por Covid en Galicia, fronte aos 329 notificados un día antes.
Segundo notificou o Sergas, na última xornada detectáronse 70 novos contaxios na área sanitaria da Coruña, 59 na área de Lugo, 69 na área de Santiago, 45 na área de Vigo, 47 na área de Ourense, 14 na área Sanitaria de Ferrol e 30 contagios novos na área de Pontevedra. Tendo en conta estes contaxios e as últimas altas epidemiolóxicas (621), o número de casos activos de Covid en Galicia sitúase en 7.522, 293 casos menos que hai un día.
Os casos activos descenden en todas as áreas, excepto a de Lugo, onde se estabiliza con 1.402 infeccións (sen cambios). Deste xeito, A Coruña continúa á cabeza da relación de casos activos, con 1.871 (122 menos); seguida pola área de Lugo, con 1.402 casos; e pola de Vigo, que conta con 1.250 infeccións activas tras negativizarse 45 casos.
Na área de Santiago son 1.309 casos activos (oito menos); na de Ourense hai 679 casos (16 máis); na de Pontevedra hai 504 casos (25 menos); e na de Ferrol son 507 infeccións activas (22 menos).
PRESIÓN HOSPITALARIA
Con respecto á presión hospitalaria, nas últimas horas contabilizáronse 53 pacientes en UCI (un máis que nas últimas 24 horas) e 153 hospitalizados en unidades convencionais (tres menos). Por áreas, a carga asistencial baixa en tres das zonas, sobe en outras tantas e estabilízase na de Ferrol, que non rexistra cambios desde a xornada anterior con cinco pacientes en UCI e 17 en planta.
O lado positivo represéntano A Coruña, que aínda que non mostra variacións en canto a hospitalizados en UCI (17), si conta con sete camas menos ocupadas en unidades convencionais (37). A presión baixa tamén en Vigo, que mantén a 10 pacientes en críticos pero que conta con tres menos en planta; e na de Santiago, tamén sen cambios en UCI (cinco pacientes), pero cun hospitalizado menos en unidades convencionais (16)
Por outra banda, a carga hospitalaria aumenta, aínda que levemente, nas áreas de Lugo, con 29 pacientes en planta (+6) e catro en UCI (sen cambios); en Pontevedra, con 10 hospitalizados en unidades convencionais (+2) e cinco camas ocupadas en críticos (sen cambios); e en Ourense, onde si aumentan os pacientes en UCI (+1) --sete en total--, e onde ademais continúan 20 persoas ingresadas en plantas convencionais (sen cambios).
