A Xunta deseña un plan de dixitalización en educación cun investimento de 120 millóns nos tres próximos anos

O plan de dixitalización da educación en Galicia deseñado pola Xunta co horizonte posto no ano 2030 contempla un investimento de 120 millóns de euros durante os tres primeiros anos de aplicación.

Así o avanzou o presidente autonómico, Alberto Núñez Feijóo, na rolda de prensa posterior ao Consello da Xunta que deu luz verde a esta estratexia que pretende "dixitalizar" a contorna educativa de aquí ao ano 2030.

O obxectivo do programa é "non só educar para a vida dixital" senón que esta "se integre" no propio ensino. Para iso, o plan consta de 12 liñas estratéxicas que pivotan sobre dúas ideas: xerar "un ecosistema" dixital nos centros educativos e formar tanto a profesorado como alumnos nestas novas competencias e tecnoloxías.

Durante os primeiros tres anos de aplicación do programa, a Administración autonómica destinará 120 millóns de euros para a instalación de equipos, reducir a fenda dixital ou avanzar na "progresiva dixitalización" de "todo o que rodea" aos procesos educativos, segundo resaltou Feijóo.

12 ACCIÓNS "CRAVES"

A estratexia contempla unha ducia de accións "craves" para alcanzar estes obxectivos, a desarollar en "todas as áreas académicas" e que pretenden involucrar á comunidade educativa coa mirada posta no ano 2030.

A primeira destas accións é, segundo expuxo Feijóo, crear "polos creativos" en todos os centros educativos. "Falamos de espazos de solución de problemas reais, pensamento de deseño e habilidades, abordados desde unha perspectiva de competencia STEM", matizou o presidente.

Os centros terán un plan dixital que estableza unha serie de medidas a desenvolver e os recursos dos que dispoñan. Ademais, tamén se establece a creación dunha plataforma virtual para formar ao profesorado en asuntos como a intelixencia artificial, un ámbito que goza de peso na estratexia para que os centros teñan equipamentos cos que achegar este mundo ou o da robótica ao alumnado.

LOITA CONTRA AS 'FAKE NEWS'

Outro dos aspectos destacados do programa é sensibilizar ao alumnado sobre as noticias falsas ('fake news'), para o que levarán a cabo "accións específicas" que buscarán dotar aos máis novos de ferramentas e coñecementos para que poidan identificalas.

Todas estas medidas estarán acompañadas polo desenvolvemento do Plan de Nova Arquitectura Pedagóxica de Galicia, deseñado pola Consellería de Educación para reconfigurar os espazos dos centros escolares e que ten como un dos seus alicerces a adaptación ás novas necesidades que carrexan a incoporación da educación dixital ao ensino.

OUTROS ACORDOS DE EDUCACIÓN

Por outra banda, o Consello da Xunta deste xoves tamén adoptou outra serie de acordos en materia de educación, entre o que destacan os convenios coa Universidade de Santiago de Compostela (USC) para a captación e promoción de talento. En concreto, a USC percibirá un total de 3,18 millóns para a actualización de laboratorios e outros equipamentos, así como para financiar o programa de captación de talento Beatriz Galindo.

Ademais, o Executivo tamén autorizou o acordo de colaboración entre Educación e a Fegamp para sufragar os gastos de limpeza nos centros públicos integrados a través dun convenio que ascende a máis de 650.000 euros. Por último, o Consello deu luz verde a unha serie de contratos para o transporte do alumnado de centros educativos especiais durante o curso que arrinca nas próximas semanas.