Feijóo di que as palabras do Papa sobre visitar Santiago son "unha alegría" e unha "fonte de esperanza"
O presidente da Xunta cre que "sería fantástico" que o Pontífice se desprazara a Santiago.
Por Europa Press / Redacción | SANTIAGO DE COMPOSTELA | 02/09/2021 | Actualizada ás 16:54
O presidente da Xunta, Alberto Núñez Feijóo, cualificou de "unha alegría" e unha "fonte de esperanza" para Galicia as palabras do Papa Francisco sobre a posibilidade de visitar Santiago con motivo do Ano Santo, unha viaxe que o Pontífice se comprometeu a sopesar no caso de que llo permita a saúde.
Este venres, na rolda de prensa posterior á reunión do seu goberno, o mandatario autonómico mostrou a súa satisfacción polas declaracións do Papa Francisco, que nunha entrevista concedida á Cadena COPE o pasado mércores abriu a porta a visitar a capital galega e remarcou que sería o único lugar de España ao que se desprazaría no caso de aceptar a invitación polo Xacabeo.
Feijóo agradeceu ao Papa que "estea a pensar na posibilidade" de acudir a Santiago no ano 2022, á vez que apuntou que a palabra "pensar" foi a que empregou cando foi convidado a peregrinar á cidade do Apóstolo na audiencia que Francisco mantivo con el e co arcebispo de Santiago, Julián Barrio, no mes de xuño.
"É sen dúbida unha alegría e unha fonte de esperanza para o pobo galego, para Galicia e tamén para os españois", manifestou o presidente da Xunta, que cre que "sería fantástico" que Francisco se desprazase a Santiago "para finalizar o mellor Ano Santo da historia, a pesar da pandemia".
