Voluntarios de Ecovidrio limparán os residuos ao final de cada etapa da Volta no seu paso por Galicia
Os gañadores das tres etapas galegas recibirán un trofeo de vidro reciclado polos veciños.
Por Europa Press / Redacción | SANTIAGO DE COMPOSTELA | 02/09/2021 | Actualizada ás 18:20
O 'pelotón verde' de Ecovidrio colaborará coa Volta Ciclista ao seu paso por Galicia mediante a limpeza de residuos e a loita contra o abandono de refugallos no medio natural. Nun comunicado, explica que, ao ser a comunidade autónoma protagonista das etapas 19, 20 e 21 os próximos 3 e 5 de setembro, ao seu paso por Monforte de Lemos, Mos e Santiago de Compostela, o 'pelotón verde' de Ecovidrio asumirá este traballo Ademais, sinala que os gañadores das tres etapas galegas recibirán un trofeo de vidro reciclado polos veciños.
A iniciativa estará a cargo de voluntarios ambientais de Ecovidrio que, tras finalizar cada etapa en Monforte de Lemos (3 de setembro), Mos (4 de setembro) e Santiago de Compostela (5 de setembro), encargaranse de limpar os residuos que se xeraron para manter o medioambiente limpo.
Nas edicións anteriores, os máis de 200 voluntarios que pasaron polo programa recolleron os residuos nas zonas de maior sensibilidade ambiental. Este ano amplíase o seu labor a todo o percorrido, polo que actuarán ao finalizar cada unha das 21 etapas desta edición da Volta.
