As Redeiras de Atalaia da Guarda no 'Arte de man' de Allariz
A presenza destas artesás, que exportan as súas artes a varios países, será un dos atractivos deste mercado de artesanía. A mostra contará cuns 20 postos e será o vindeiro día 12 de setembro na rúa Santo Estevo do casco histórico.
Por X.M. Fernández | Allariz | 09/09/2021 | Actualizada ás 09:00
Este ano 2021, Arte de Man estreará nova localización dentro do casco histórico de Allariz. O novo escaparate deste Mercado de Artesanía, que terá lugar o domingo 12 de setembro, será a rúa Santo Estevo.
O cambio de localización vén dado, segundo fontes do Concello de Allariz, pola situación actual da pandemia. Manterase a súa esencia de celebrarse nas rúas de Allariz mais cambiando de emprazamento cara a zona da Igrexa de Santo Estevo. A cita, reunirá a artesás galegos/as --locais e do resto da comunidade galega-- en horario ininterrompido de 11:00 a 20:00 h.
Arte de Man ofertará exposición e venda de distintas disciplinas artesás, tradicionais e innovadoras, como son: a cerámica, pintura, debuxo e gravado, escultura, xoiería e bixutería, téxtil, coiro e madeira, entre outros. Durante a xornada dominical tamén se poderá gozar de música en directo.
María López, concelleira de Promoción Económica, salientou na presentación do evento que “a artesanía forma parte da nosa identidade e do noso patrimonio cultural e tamén artístico. Arte de Man é sempre unha oportunidade para por en valor e dar a coñecer aos nosos artesáns e diferenciarnos cun produto creado seguindo as pautas tradicionais pero innovando no deseño”.
PRESENZA DAS REDEIRAS DE ATALAIA DA GUARDA
Este ano como novidade haberá unha demostración das Redeiras de Atalaia da Guarda que amosarán como a partir das redes de pesca se pode crear artesanía. Estas artesás, que combinan profesionalidade e innovación, exportan as súas artes a varios países.
A Asociación de redeiras do Baixo Miño Atalaia, especializadas en armar redes de baixura, aproveitan o seu saber facer para aplicalo á artesanía.
