Por E.P. | SANTIAGO DE COMPOSTELA | 09/09/2021 | Actualizada ás 20:00
O Goberno galego tamén deu luz verde a un acordo co Concello da Laracha para mellorar a rede do abastecemento do municipio, cun investimento de 1.850.000 euros.
A Consellería de Infraestruturas e Mobilidade, a través de Augas de Galicia, cofinanciará a actuación nun 80% coa achega de 1.480.000 euros. O Concello da Laracha contribuirá ao financiamento do 20% restante, destinando 370.000 euros.
Segundo detallou a Xunta, a entidade local asume tamén a realización de xestiónelas pertinentes para posibilitar a execución das obras, así como a recepción, mantemento e conservación das actuacións que leven a cabo.
As obras serán financiadas pola Unión Europea, no marco do eixo REACT UE do programa operativo Feder Galicia 2014-2020, como parte da resposta da Unión á pandemia da covid-19.
CANON DE EXPLOTACIÓN DO ENCORO DO UMIA
O Consello da Xunta, así mesmo, aprobou a renovación da colaboración entre a Consellería de Infraestruturas e Mobilidade e os concellos de Caldas, de Cuntis e de Moraña, polo que Augas de Galicia destinará case 400.000 euros do canon de explotación do encoro do Umia ao financiamento de actuacións educativas e sociais neste tres municipios da provincia de Pontevedra.
O Goberno galego referendou así a firma, un ano máis, do convenio no que participa como entidade colaboradora a Deputación de Pontevedra, que asume a tarefa de administrar eses fondos autonómicos entre este tres concellos e velar pola súa correcta aplicación.
Caldas de Reis, Cuntis e Moraña beneficiaranse anualmente da achega económica á que está suxeita a empresa titular da explotación hidroeléctrica da presa, con base na concesión da explotación outorgada pola entidade hidráulica da Xunta.
MELLORA DA SEGURIDADE NA AC-173, EN OLEIROS
Na súa reunión deste xoves, o Goberno galego tamén deu o visto e prace á firma doutro convenio de colaboración co Concello de Oleiros para executar unha obra de mellora da seguridade viaria peonil na estrada autonómica AC-173 en Arillo, cun investimento de case 210.000 euros.
A Xunta destacou que se trata de executar dous tramos de itinerario peonil e ciclista na marxe dereita da AC-173 e na marxe esquerda da estrada AC-181 para conectar a urbanización Rialta, en Arillo, co itinerario existente en Lourido.
Segundo o acordo, a Consellería de Infraestruturas e Mobilidadefinanciará o 90% da actuación, case 189.000 euros, mentres que o Concello achegará o 10% do financiamento restante.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.