Galicia rexistra a mellor cifra de pago a provedores entre as comunidades
O período medio de pago foi de 11 días, 12 menos que a media autonómica.
Por Europa Press / Redacción | SANTIAGO DE COMPOSTELA | 10/09/2021 | Actualizada ás 18:48
O período medio de pago de Galicia aos seus provedores foi de 10,99 días ao peche do primeiro semestre de 2021, mellor cifra entre comunidades.
Segundo os datos publicados este venres polo Ministerio de Facenda, Galicia paga en 12 días menos que a media autonómica, que se sitúa en 23,19 días. Igualmente está case 20 días por baixo do límite de 30 días establecido pola normativa estatal.
En canto á débeda comercial, os datos do Ministerio sitúan a Galicia como a terceira comunidade co menor dato. O cociente débeda/PIB da comunidade galega é do 0,13% no primeiro semestre, por baixo da media autonómica (do 0,28%). O global das autonomías é de 3.425 millóns, dos que 82 millóns correspóndense con Galicia.
