O Goberno convoca 10.634 prazas de Formación Sanitaria Especializada
Son un 3,8% máis que na convocatoria anterior
Por E.P. | SANTIAGO DE COMPOSTELA | 11/09/2021 | Actualizada ás 15:42
O Ministerio de Sanidade convocou 10.634 prazas de Formación Sanitaria Especializada (FSE) e as probas de acceso ás diferentes titulacións celebrarase o 29 de xaneiro de 2022, segundo a orde publicada este sábado no Boletín Oficial do Estado (BOE).
Medicina é a titulación na que se ofertan máis prazas, con 8.188, seguida de Enfermaría (1.822), Farmacia (309), Psicoloxía (204), Bioloxía (46), Física (43) e Química (22).As 10.634 prazas desta convocatoria supoñen un 3,8% máis fronte a anterior e as disciplinas nas que máis se incrementa a porcentaxe de prazas son Farmacia (+15,7%) e Enfermaría (+8,3%), mentres que en Bioloxía redúcense un 8% e en Física mantéñense igual.
Os exames constarán de 200 preguntas, máis 10 de reserva, con catro opcións de resposta das que só unha é correcta, explica Sanidade, que tamén apunta que a duración das probas será de catro horas e 30 minutos. "Cabe destacar a incorporación de oito prazas no sistema formativo de residencia da especialidade de Medicina Legal e Forense, que vai ser necesaria para o acceso ao Corpo de Forenses", engade a carteira dirigia por Carolina Darias.
O procedemento electrónico continúa en todas as fases desde a presentación de solicitudes, a interposición de reclamacións ou recursos e na adxudicación.
Tamén se mantén a reserva do 7% de prazas para persoas con discapacidade superior ao 33%, sumando 744 prazas. A cota actual para extracomunitarios sen permiso de residencia ou traballo é de ata 328 prazas en Medicina (4%), 36 para Enfermaría (2%) e nove para Farmacia (3%).
