É o peixe o motivo da lonxevidade dos galegos?
Un congreso en Santiago analiza as chaves da dieta atlántica. Feijóo destaca o incremento do consumo deste produto durante a pandemia.
Por Europa Press / Redacción | Compostela | 13/09/2021 | Actualizada ás 13:25
Un foro organizado pola Universidade de Santiago en colaboración coa Xunta aborda este luns e o martes as claves da coñecida como dieta atlántica, que se apoia no peixe, os produtos do mar e de proximidade e que algúns expertos relacionan coa lonxevidade por encima da media que teñen os galegos.
O congreso foi inaugurado este luns na aula magna do Complexo Hospitalario Universitario de Santiago (CHUS) polo presidente da Xunta, Alberto Núñez Feijóo, e o reitor da USC, Antonio López, introducidos no acto de apertura pola pediatra e profesora Rosaura Leis.
A cita, que se celebra este luns en Santiago e o martes en Ribeira, pretende analizar desde unha perspectiva científica e social as vantaxes do consumo de peixe e, en xeral, da chamada dieta atlántica que, ademais dos produtos do mar, tamén aposta polos comestibles de proximidade e frescos.
O mandatario autonómico puxo o acento na importancia do peixe, un elemento "imprescindible" na dieta diaria dos galegos que, ademais, "identifica" a Galicia, supón un dos alicerces da súa gastronomía e, á súa vez, un atractivo turístico.
Para Feijóo, os produtos do mar son claves para que Galicia teña "unha das dietas máis equilibradas do mundo", o que contribúe a alcanzar o obxectivo de "vivir mellor" e facelo "durante máis tempo", como, ao seu xuízo, demostra o feito de que a esperanza de vida na Comunidade galega sexa superior á media.
LECCIÓNS DA PANDEMIA
O presidente galego tamén fixo referencia ao aumento do consumo de peixe e produtos do mar durante a pandemia que, ao seu xuízo, deixou a "lección" de que é posible levar a cabo "ciclos curtos" de produción e comercialización, o que favorece as "cadeas comerciais de proximidade".
Pola súa banda, o reitor da USC, Antonio López, tamén enxalzou durante a súa intervención as virtudes do consumo de peixe, dado que, ademais dos seus beneficios para a saúde, tamén ten efectos no medio ambiente, xa que pode significar unha redución da pegada de carbono ao desenvolverse en cadeas de consumo de proximidade.
