Galicia alcanza o 80% de poboación con pauta completa tras unha xornada con case 30.000 vacinas administradas
Case o 85% dos galegos contan con polo menos unha dose despois do primeiro día de vacinación nos campus universitarios
Por Europa Press / Redacción | SANTIAGO DE COMPOSTELA | 14/09/2021 | Actualizada ás 13:38
Galicia superou o 80% de poboación vacinada coa pauta completa contra a covid-19, despois de que na xornada deste luns --primeiro día de vacinación en campus universitarios-- se administraran 29.711 dose, a gran maioría (27.812) destinada a concluír a inmunización.
Así, segundo o balance da Consellería de Sanidade publicado na mañá deste martes con datos ata o fin da xornada de vacinación do luns, administráronse ata o momento 4.260.096 inxeccións. Son o 97,88% das 4.352.189 doses recibidas ata o momento pola Comunidade --15.210 chegadas nas últimas horas--.
Deste xeito, hai 2.177.868 galegos coa pauta completa --27.812 máis que hai un día-- contra a covid-19, que supoñen o 80,66% do total de habitantes de Galicia e o 80,73% da poboación diana da campaña de vacinación contra o coronavirus.
Por grupos de idade, un total de 1.657.972 galegos de máis de 40 anos recibiron polo menos a primeira dose. Son 3.964 máis que 24 horas atrás e, con eles, a porcentaxe de cobertura neste grupo de idade supera xa o 96,39%. No grupo de 30 a 39 anos, vacináronse con, como mínimo, a primeira dose 266.952 pacientes na Comunidade galega (+1.945 no último día), un 82,57% deste tango etario.
Así mesmo, 196.720 mozos de entre 20 e 29 anos (+2.248) recibiron polo menos a primeira inxección, o que representa o 85,23% desta franxa. E, entre os máis pequenos, de 10 a 19 anos, foron vacinados 169.579 mozos e mozas, 2.336 máis que a xornada anterior.
VULNERABILIDADE E PROBABILIDADE DE EXPOSICIÓN
En canto aos grupos máis vulnerables, 60.054 persoas recibiron a primeira dose da vacina, mentres 59.578 completaron xa a pauta contra a covid-19. Por probabilidade de exposición, outros 145.283 galegos contan coa primeira picada e 144.058 están xa inmunizados.
En total, 2.291.224 galegos recibiron polo menos unha dose da vacina contra a covid, o que representa un 93,35% da poboación diana da campaña e un 84,86% da xeral na Comunidade.
