A CIG acusa de "raquítica" a suba do SMI fronte aos 1.150 que marca a Carta Social Europea

A Confederación Intersindical Galega (CIG) cualificou de "raquítica" e "miserable" a subida do Salario Mínimo Interprofesional ata os 965 euros que, a xuízo da central nacionalista, "frea o avance" cara a alcanzar os 1.150 euros mensuais que marca a Carta Social Europea.

Nun comunicado emitido este venres tras coñecerse o acordo subscrito entre Goberno e os sindicatos CCO e UGT do que se desmarcou a patronal, a CIG incide no que a alza do 1,5% no salario mínimo "non compensa a perda do poder aquisitivo" ao estar dous puntos porcentuais por baixo do aumento do IPC en Galicia en agosto (3,9%).

Así, cren que o incremento pactado dificulta a posibilidade de alcanzar a contía que marca a Carta Social Europea para o SMI en España, fixada no 60% do salario medio, é dicir, 1.150 euros.

Por tanto, a central nacionalista considera que o descolgue da Confederación Española de Organizacións Empresariais (CEOE) do acordo para subir o SMI é "unha escenficación" entre a patronal e o Ministerio de Traballo que encabeza a vicepresidenta segunda, Yolanda Díaz.

"Con este pacto prodúcese unha escenificación que non é crible e na que a patronal interpreta un desencontro co propio ministerio cando os seus representantes participaron na comisión de expertos que avalou este incremento insuficiente", incidiu o secreatrio confederal de Negociación Colectiva do sindicato, Paco Sío.

Por tanto, a CIG reclama ao Goberno que "deixen de mentir e de enganar á clase traballadora" e adopte un incremento "real" do SMI ata os 1.150 euros mensuais, á vez que se manteñen as subidas anuais vinculadas ao IPC.

Rolda de prensa de delegados de CIG.