Tres novos mortos elevan a 2.621 as vítimas da pandemia en Galicia

As autoridades sanitarias informaron este luns de tres novos falecidos con covid-19 en Galicia e que elevan a 2.621 o total de vítimas da pandemia.

Estes tres novos casos producíronse desde este sábado e todos eles presentaban patoloxías previas, segundo engaden desde a Consellería de Sanidade.

O primeiro trátase dunha muller de 87 anos de idade cuxo falecemento se rexistrou o día 18 e que estaba ingresada no Complexo Hospitalario de Ferrol.

Ao día seguinte, tívose constancia da morte dun home de 59 anos no Complexo Hospitalario de Ourense, e este luns doutro home de 93 anos no Hospital do Barco de Valdeorras.