Por E.P. | SANTIAGO DE COMPOSTELA | 22/09/2021 | Actualizada ás 18:42
O Tribunal Superior de Xustiza de Galicia (TSXG) desestimou un recurso interposto contra a Xunta polo fillo dunha interna --que faleceu, segundo recolle a sentenza-- nunha residencia por impedir, nun acordo adoptado o 12 de marzo de 2020, todo tipo de comunicación presencial neses centros debido á pandemia da covid-19.
A sección terceira da Sala do Contencioso-administrativo do TSXG entende que a medida de suspender as visitas en residencias da terceira idade "non só foi necesaria e xustificada, lóxica e razoable, senón tamén proporcional, como o demostraron os datos estatísticos".
Os maxistrados destacan que a resolución da Xunta fundamentouse na Lei orgánica de 14 de abril de 1986, a cal habilita ás autoridades sanitarias para a adopción dese tipo de medidas "cando aprecien indicios racionais da existencia dun perigo para a saúde da poboación".
A nivel autonómico, segundo sinalan os xuíces na sentenza, a Lei 8/2008 tamén outorga esa posibilidade á Administración. Por tanto, conclúen que o Consello da Xunta, na súa condición de autoridade sanitaria, non infrinxiu ningunha normativa.
"PROTEXER A VIDA E INTEGRIDADE" DOS USUARIOS
O TSXG subliña no fallo que cando a Xunta suspendeu as visitas e prohibiu aos internos saír das residencias, salvo causas de forza maior ou excepcionais que o xustificasen, fíxoo para "protexer a vida e integridade das persoas usuarias".
"Como é notorio, neles alóxanse sectores de poboación especialmente vulnerables, nos que a enfermidade da covid-19 incidiu de modo virulento, ocasionando altos índices de mortalidade e ata colapso dos servizos sanitarios", alega.
A NAI DO RECLAMANTE FALECEU
Na sentenza tamén se incide en que, á parte do que pretendía o demandante, que era visitar á súa nai na residencia, o que "lamentablemente non pode facer a día de hoxe, pois el mesmo acredita que xa faleceu", e dado que a suspensión das visitas nestes centros xa se levantou, a demanda parece "non ter obxecto".
Conclúe finalmente que, "na intelixencia de que a súa nai falecese por falta de atención, esa circunstancia (de acreditarse) podería ata ter unha dimensión penal", pero puntualiza que en todo caso esta cuestión resulta "allea" a este procedemento contencioso-administrativo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.