Diego Calvo revalida o seu cargo como presidente do PP da Coruña

Diego Calvo, anterior líder dos populares coruñeses e único candidato ao cargo, revalidou este sábado o seu posto como presidente do Partido Popular da Coruña cun 96% dos votos.

Tal e como anunciou a conselleira de Medio Ambiente e presidenta do Congreso Provincial no que se tomou a decisión, Calvo obtivo 780 dos 814 votos anotados. En branco, rexistráronse 31 e nulos, 3.

Así, segundo sinalou Vázquez, "por unanimidade", Diego Calvo será o presidente dos populares coruñeses catro anos máis.

Diego Calvo dirixirá na súa nova etapa á fronte do PP provincial da Coruña un equipo no que lle acompaña como secretario provincial Evaristo Ben; e no que dá relevancia ás cidades a través dos catro vicepresidencias, que ocuparán o presidente da xestora do PP de Santiago, Borja Verea; o presidente do PP ferrolán, José Manuel Rey Varela; e o presidente da xestora do PP coruñés, Martín Fernández Prado, así como a portavoz local na urbe herculina, Rosa Gallego.

Con José Manuel Romay Beccaría e Carlos Negreira como presidentes de Honra, a portavoz do partido será a conselleira Ángeles Vázquez e o vicesecretario de acción electoral un dos 'homes fortes' de Alberto Núñez Feijóo, o secretario xeral de Presidencia, Álvaro Pérez López.

O actual delegado da Xunta na Coruña, Gonzalo Trenor, será o vicesecretario de Organización Territorial.

Así mesmo, varias conselleiras, alcaldes e outros cargos destacados do partido ocuparán as vicesecretarías territoriais: Fabiola García, Rosa Quintana, Ethel Vázquez, Ángeles Vázquez, José Antonio Santiso Miramontes, Carlos Alvelo, Martina Aneiros, José Manuel López Varela, José Luís Martínez Sanjurjo, José Luís Oujo e Jesús María Fernández Rosende.

Así mesmo, a conselleira Rosa Quintana estará á fronte do Comité Electoral; mentres que Carlos Martínez Carrillo fará o propio no Comité de Alcaldes; e a parlamentaria Paula Prado no Comité de Igualdade.