Mondoñedo nomeará filla adoptiva predilecta á atleta paralímpica Susana Rodríguez, ouro en Tokio

O Concello quere recoñecer "os seus éxitos deportivos, pero, especialmente, os valores que representa".

Por E.P. | Mondoñedo | 26/09/2021 | Actualizada ás 17:37

Comparte esta noticia

A corporación municipal do Concello de Mondoñedo aprobou na súa sesión plenaria, por unanimidade de todas as forzas políticas, iniciar o expediente para concederlle á atleta paralímpica Susana Rodríguez Gacio a distinción de filla adoptiva predilecta.

A atleta paralímpica, Susana Rodríguez
A atleta paralímpica, Susana Rodríguez | Fonte: CONCELLO DE MONDOÑEDO.

Segundo informou o Goberno local, o rexedor municipal, Manolo Otero, comunicoulle directamente á médico e deportista de raíces mindonienses o acordo do pleno, ante o que se mostrou "moi contenta e ilusionada".

Ademais, o alcalde tamén mostrou o desexo do concello de organizar un acto "coincidindo cunha data que se adapte ao seu calendario de compromisos e ocupacións".

Susana Rodríguez Gacio gañou a medalla de ouro en tríatlon na clase PTVI e a quinta praza da proba de 1.500 metros da clase T11 nos Xogos Paralímpicos de Tokio, co que se converteu ademais na primeira española en competir en dous deportes distintos.

Tres veces campioa mundial de tríatlon, terminou en setembro do 2020 a especialidade de Medicina Física e Rehabilitación no Centro Hospitalario de Santiago.

"O Concello quere recoñecer, por tanto, a Susana Rodríguez polos seus éxitos deportivos; pero, especialmente, polos valores que representa: enerxía, esforzo, competencia e superación", destaca.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta