Bibiana Candia, Elena Medel e José de Cora, finalistas do Premio Internacional Afundación de Xornalismo Julio Camba
Seleccionados de entre 119 artigos.
Por E.P. | SANTIAGO DE COMPOSTELA | 29/09/2021 | Actualizada ás 18:18
Os xornalistas Bibiana Candia, Eena Medel e José de Cora foron seleccionados como finalistas do Premio Internacional Afundación de Xornalismo Julio Camba. O xurado do certame, composto por Alfredo Conde, Cristina Sánchez Andrade, Luís Pousa, Gervasio Pousadas, Ramón Pernas e Isaac González Toribio, deu a coñecer este mércores o seu fallo nun acto no que tamén participou o presidente de Afundación, Miguel Ángel Escotet.
Así, tres traballos pasaron o último corte e, seleccionados entre 119 artigos, pugnan agora por levar o primeiro premio da edición de 2021 do galardón de xornalismo que leva o nome do escritor nado en Vilagarcía.
Trátase de 'Una legión de señoras en bata', de Bibiana Candia e publicado en Letras Libres; 'Un texto sobre un pájaro que alzaba el vuelo', de Elena Medel e editado en El País; e, por último, 'Como siempre' de José de Cora Paradela, publicado no diario lugués O Progreso.
O presidente de Afundación resaltou o número de participantes e o incremento "notable" de concorrencia internacional, o que interpretou como "aval da pervivencia" dos premios Julio Camba. "É unha gran responsabilidade e un orgullo continuar atesourando un certame das dimensións do Julio Camba tanto pola calidade dos contidos, a súa pluralidade de pensamento e a beleza das súas formas como polo seu alcance", incidiu Escotet, que puxo o acento no aumento dun 23% dos artigos presentados ao concurso.
Pola súa banda, o presidente do xurado, Alfredo Conde, fixo fincapé en "a complexidade" que entraña seleccionar tres artigos de entre máis dun centenar de pezas "de elevada calidade".
Así as cousas, o xurado deberá agora decidir quen de entre Candia, Medel e De Cora faise cun premio dotado con 10.000 euros e únese a un palmarés no que figuran nomes como o de Carlos Casares ou Manuel Rivas como gañadores dun premio que, desde que botou a andar en 1980, só se levaron tres mulleres.
