O Concello de Santiago, sobre a vertedura ao río Tambre: "non entrou auga contaminada na rede de abastecemento"

O Concello de Santiago de Compostela asegurou este xoves, sobre a vertedura ao río Tambre, que "nunca entrou auga contaminada que non cumprise os parámetros sanitarios na rede de abastecemento de auga potable do municipio".

No período de interpelacións do pleno municipal celebrado este xoves, ante unha pregunta do grupo do BNG formulada por Goretti Sanmartín, a concelleira de Medio Ambiente, Mª Milagres Castro Sánchez, aseverou ademais que "en ningún momento cortouse a subministración de auga".

Sanmartín, pola súa banda, lamentou a falta de comunicación entre a Xunta de Galicia e o Goberno municipal, e pediu "clarificar responsabilidades" tanto respecto das dúas administracións como en canto á empresa concesionaria. A portavoz do BNG quixo saber ademais se se executarán sancións dado que, "a pesar da pequena envergadura", as verteduras danse "con excesiva frecuencia", e cantos litros, finalmente, foron os filtrados.

Sanmartín non entende "os motivos da demora en comunicar un problema de tal magnitude" --"que pasou todo ese tempo?"-- e se, a este respecto, vai o Executivo municipal a esixir á Xunta e á empresa algún tipo de responsabilidade.

O BNG pediu tamén que se reduzan os recibos de auga dos composteláns, que se establezan axudas para restablecer a flora e a fauna prexudicada, que se sancione á concesionaria pola turbiedadE, o mal cheiro e o exceso de cloro na auga; así como saber se se creará un protocolo para evitar novas filtracións polas choivas dos próximos meses e se se terá en conta a situación para a elaboración dos pregos do próximo concurso municipal.

A XUNTA, "ÚNICA CON COMPETENCIAS"

Pola súa banda, o Goberno municipal instou ás forzas municipais a reclamar á Xunta, "única administración con competencias", unha maior transparencia; así como a necesidade de "implementar" medidas de protección para as augas do río Tambre e "evita así que se poña en perigo o medio ambiente e mesmo as persoas".

"É á Xunta a quen debemos dirixirnos demandando actuacións a medio e longo prazo, solucións", asegurou a concelleira, que lamentou a "falta de transparencia ante a evidente falta de dilixencia pola súa banda" e lembrou que existen "miles de explotacións gandeiras por todo o país, algunhas preto dos ríos".

A este respecto, Sánchez Castro aseverou que "non existiu comunicación previa da Xunta nin do Seprona de vertedura, nin xoves nin venres". "Foi a propia concesionaria, mediante as súas análises habituais, a que localiza a vertedura ás 3,00 horas da mañá, paralizando a captación da auga de forma preventiva, evitando que a vertedura entrase nas instalacións de auga do Concello", explicou.

SANCIÓNS E VULNERABILIDADES

A responsable de Medio Ambiente apuntou ademais que, durante eses días, "intensificáronse os controis" e, "en previsión de que se puidese cortar a auga, organizáronse camións cisterna". A última hora do sábado, segundo sinalou a concelleira, iniciouse de novo o proceso de potabilización, "posto que os niveis do río volvían ser os permitidos".

En canto ás sancións, e a pesar de recoñecer a turbiedadE da auga "en lugares concretos e acoutados no tempo", Sánchez non ve "razoable" multar á empresa, non tampouco reducir a factura. Ademais, a concelleira informou de que funciona un dispositivo preventivo, unha sonda no río que fai analíticas de continuo "para previr unha situación similar á ocorrida".

Aínda que Sánchez asegurou que o Concello "actuou correctamente", si admitiu unha reflexión: a evidente vulnerabilidade de Santiago e os municipios veciños por ter unha única fonte de abastecemento. "Por suposto teremos en conta esa vulnerabilidade no próximo concurso", sinalou a responsable de Medio Ambiente.