A Deputación da Coruña rexeita a "exclusión financeira" da poboación do rural e pide medidas
Demandan medidas á Xunta e ao Goberno estatal.
Por E.P. | A CORUÑA | 01/10/2021 | Actualizada ás 18:32
A Deputación da Coruña mostrou o seu rexeitamento á "exclusión financeira" da poboación do rural da provincia ante o peche de varias sucursais bancarias, "o que impide á cidadanía das zonas afectadas o acceso a un servizo básico".
O pleno do ente provincial debateu este venres, en pleno, tres mocións sobre este asunto, presentadas polo PSdeG-PSOE, Marea Atlántica e Partido Popular, con demanda de medidas á Xunta e ao Goberno estatal, neste último caso na presentada polos populares.
Ademais, o organismo provincial aprobou un investimento de máis de 2,5 millóns de euros para a mellora da seguridade viaria en tres estradas provinciais. As obras permitirán construír dúas novas pontes, unha sobre o río Anllóns e outra sobre o Mandeo.
A Deputación da Coruña tamén aprobou unha moción da Marea Atlántica sobre a rexeneración dos terreos contaminados pola mina de Touro e O Pino. Todos os grupos, excepto o PP, que se abstivo, votaron a favor de medidas para recuperar os terreos pola concentración de metais pesados máis de trinta anos despois do peche da explotación mineira.
