Ferido grave un mozo de 19 anos ao ser atropelado en Santiago de madrugada por un coche que fuxía da Policía
Un home acaba detido tras propinarlle unha puñada na cara a un policía local que tratou de intervir nunha pelexa.
Por Europa Press / Redacción | SANTIAGO DE COMPOSTELA | 03/10/2021 | Actualizada ás 16:42
Un mozo de 19 anos tivo que ser trasladado ao hospital ferido de gravidade tras ser atropelado por un coche que fuxía da Policía Nacional. Ocorreu de madrugada en Santiago, cando centos de mozos saían dunha discoteca do Ensanche.
Segundo informan a Europa Press fontes municipais, sucedeu sobre as 4,20 horas da mañá na rúa República do Salvador. Ao parecer, o vehículo empezou a realizar "unhas manobras estrañas" polo centro da cidade, o que motivou que unha patrulla da Policía Nacional comezase a perseguilo para identificar o condutor.
Foi ao penetrarse na rúa onde había centos de mozos recentemente saídos dunha discoteca cando arroiou a un deles. Entón, os policías abandonaron a persecución e procederon a atender ao ferido, que foi trasladado grave ao Hospital Clínico. O coche conseguiu fuxir.
A vítima do atropelo, segundo indican as mesmas fontes consultadas por Europa Press, permanece na unidade de coidados intensivos (UCI) pero "está fóra de perigo".
Un dos acompañantes do condutor conseguiu baixarse do coche para identificalo ante os axentes. No entanto, xa pola mañá, o presunto responsable dos feitos presentouse na Comisaría e os axentes puideron tomarlle declaración.
Debido ao temporal e ás abundantes choivas caídas en Galicia de madrugada, as fontes do departamento de Seguridade do Concello sinalan que, aínda que "non houbo aglomeracións" nocturnas da magnitude de semanas pasadas, si houbo "incidentes" como este atropelo.
Ademais, nesa mesma zona, produciuse unha pelexa entre varios mozos na que tivo que intervir a Policía Local. Un dos participantes resultou detido despois de propinarlle unha puñada na cara a un axente cando lle pediu que se identificase.
