Reaccións paro: A Xunta di que Galicia está "no camiño da reactivación" e os sindicatos falan de "precariedade".

A directora xeral de Formación e Colocación, Zeltia Lado, destacou que Galicia se sitúa "no camiño da reactivación económica", xa que o número de afiliacións á Seguridade Social é maior e a cifra de parados en setembro é inferior aos rexistrados ao comezo da pandemia.

Así, a comunidade galega conta con 1.034.229 cotizacións e 153.054 parados fronte aos 1.002.624 cotizantes e 174.481 desempregados de marzo de 2020, resalta a Xunta. Ademais, chama a atención sobre que acumula seis meses consecutivos de baixada de paro na evolución anual, o que, segundo Lado, "mostra a recuperación do mercado de traballo".

A isto engade a saída de traballadores de expedientes de regulación temporal de emprego (ERTE): 155.196 de abril de 2020 a setembro de 2021, o 94,04%, "fronte ao 92,94% do Estado", sinala.

Con respecto á caída anual do desemprego, do 13,32%, valora que é "a maior de toda a serie histórica de datos (1996) nun mes de setembro". O paro sitúase así mesmo nun nivel inferior ao de setembro de 2008, ao comezo da anterior crise. Tamén reivindica que a cifra de mulleres paradas é "a máis baixa nun setembro desde 2007" e a de menores de 30 anos, a menor de toda a serie histórica (maio 2005).

SINDICATOS

Os sindicatos denuncian "precariedade" no mercado laboral galego e "dependencia" do sector servizos, por mor dos datos de paro rexistrado publicados este luns, ante os que demandan emprego "estable".

Nun comunicado de prensa, a CIG advirte de que "crece o paro e a precariedade en Galicia e baixa a afiliación á Seguridade Social", ademais de que o incremento do desemprego en mulleres "case triplica o dos homes".

"O emprego estable debe ser a base para consolidar a recuperación", subliña UGT pola súa banda, mentres que CC.OO. urxe á Xunta a "tomar medidas ante uns datos de paro moito peores que a media estatal".

REACCIÓNS DO PP

O PP vinculou os datos do paro coñecidos este luns a unha tempada turística, mentres que o PSdeG destacou que as cifras son síntoma de que exista unha "recuperación" da actividade económica que debe usarse para crear emprego "de calidade".

Así se manifestaron os portavoces de populares, Pedro Puy, e socialistas, Gonzalo Caballero, a preguntas dos medios en senllas roldas de prensa celebradas este luns na sede da Cámara autonómica.

En concreto, os responsables político referíronse a as cifras do paro coñecidas este luns e que reflicten unha subida de 1.790 desempregados en setembro en Galicia (+1,18%), fronte á caída da media.

O portavoz do PPdeG no Parlamento, Pedro Puy, destacou que Galicia está "a iniciar o camiño cara á recuperación", xa que as persoas desempregadas xa son "menos das que existían con carácter previo á pandemia".

Con todo, a Comunidade galega rexistrou en setembro unha subida de 1.790 persoas con respecto a agosto, a pesar de que baixou en toda España. Preguntado respecto diso, Puy vinculouno ao turismo, que en Galicia "foi moito máis intenso en número de visitantes".

Por tanto, o portavoz popular pon o foco en que "hai un factor estacional que condiciona os datos" en setembro e que é "unha circunstancia concreta conxuntural". Por iso, insistiu en que "o importante é a cifra interanual" de caída do desemprego, onde Galicia "está na media de España". Así mesmo, Puy subliñou que en Galicia "se destruíu menos emprego" durante a pandemia en comparación a outras comunidades autónomas.

GONZALO CABALLERO

Pola súa banda, o secretario xeral do PSdeG, Gonzalo Caballero, celebrou a "capacidade de recuperación" que demostra a economía e que se evidencia nos recentes datos do paro, aínda que emprazou a coñecer "con detalle" as cifras trimestrais.

En todo caso, o socialista ve necesario que esta evolución xeral da economía vaia acompañada de medidas permitan a "recuperación" da ocupación, a creación de empregos "de calidade" e o "aumento das horas" de traballo.

Todos eles obxectivos que, segundo Caballero, "non consegue" alcanzar o Goberno da Xunta que preside Alberto Núñez Feijóo, a quen instou a articular medidas para paliar "o déficit" e "a brecha" que existe á hora de xerar "emprego de calidade".