Por E.P. | SANTIAGO DE COMPOSTELA | 05/10/2021 | Actualizada ás 12:17
Máis dun centenar de alumnos de 43 centros participan desde este martes en 'Galiciaskills 2021', as olimpíadas da Formación Profesional galega que se disputan ata o próximo 8 de outubro. O conselleiro de Cultura, Educación e Universidade, Román Rodríguez, asistiu ao arranque da competición no Centro Integrado de FP Carlos Oroza, en Pontevedra, que por primeira vez celébrase de forma descentralizada en 11 sedes ao longo de todo o territorio.
O obxectivo deste certame é darlle unha maior proxección e difusión á Formación Profesional que se imparte en Galicia, con 23 competicións relacionadas coas diferentes especialidades desta etapa, nas que o alumnado participante medirá as súas destrezas e demostrará as súas capacidades na realización das correspondentes probas.
Un total de 22 expertos organizan as cuestións técnicas e planifican cada unha das competicións, para as que os participantes contan tamén co apoio dos seus docentes. Ademais, os gañadores participarán en 'Spainskills', a competición a nivel nacional que se celebrará en marzo de 2022.
As olimpíadas da FP galega danse nos Centros Integrados de FP (CIFP) Carlos Oroza, Ferrolterra (Ferrol), A Granxa (Ponteareas), As Mercedes (Lugo), Valentín Paz Andrade (Vigo), Paseo das Pontes (A Coruña) e Compostela (Santiago de Compostela), e nos institutos Urbano Lugrís (A Coruña), Politécnico de Vigo, Lamas de Abade e San Clemente (estes dous últimos en Santiago de Compostela).
UN "ESCAPARATE"
Román Rodríguez valorou esta iniciativa como "un escaparate da calidade" desta opción formativa e que permite "visibilizar a aplicación práctica destes ensinos e o traballo dos alumnos, do profesorado e do conxunto do persoal dos centros", á vez que transmiten "valores como o talento ou excelencia".
"En definitiva, unha competición que demostra o nivel de nosa FP", engadiu , felicitando aos participantes por ser os alicerces "que fan destes ensinos un sinónimo de calidade, de profesionalidade, de innovación, de emprego e, por tanto, de oportunidades de futuro".
Román Rodríguez puxo en valor o crecemento da FP galega na última década, cun incremento do 74% no número de matriculados e un 92% de inserción laboral (fronte ao 51,7% do ano 2014). "Desde a Xunta seguiremos apostando pola FP e por iniciativas como esta, que permiten visibilizar o bo traballo dos centros e do conxunto do alumnado", finalizou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.