Por Europa Press / Redacción | Santiago de Compostela | 07/10/2021 | Actualizada ás 15:00
O PSOE debaterá no seu 40 Congreso Federal a redución da xornada laboral a 32 horas ou o que é o mesmo, 4 días laborables á semana e sen reducir os salarios. Así o pediron varias federacións nas súas emendas ao relatorio marco. Ademais, son moitas tamén as emendas que piden a derrogación total ou dos aspectos máis lesivos da reforma laboral do PP e mesmo reclaman volver á indemnización de 45 días por ano traballado nos despedimentos improcedentes.
Así consta na Memoria de Emendas que recompilou o PSOE, á que tivo acceso Europa Press, e que serán debatidas en 5 Comisións durante o Congreso, que terá lugar en Valencia os días 15, 16 e 17 de outubro.
As peticións para que se reduza a xornada laboral sucédense en moitas das emendas que presentaron os socialistas. Pero unhas son para reducir a xornada a 35 horas semanais e outras para que esta redución sexa moito maior, ata as 32 horas á semana, o que reduciría a 4 os días laborais.
Este é o caso das emendas que achegaron Mocidades Socialistas, Sevilla ou Palencia. A achegada polos mozos do PSOE di que se mostran "esperanzados" co Plan Piloto para ensaiar a "semana laboral de 32 horas ou 4 días" e en que esta se poida implantar na próxima década.
SEN DIMINUCIÓN SALARIAL
Outra das emendas presentada por Sevilla incide neste aspecto ao expor que se avance no estudo da "progresiva implantación da xornada laboral de 4 días á semana, sen que supoña unha redución salarial para os/as traballadores/as".
E desde Palencia incorporouse outra no mesmo sentido, na que se aposta por "unha semana laboral de 32 horas, fomentando así a conciliación laboral e familiar". Ademais, cren que esta reforma "en ningún caso" debe supor unha diminución nos salarios actuais. Queren que o PSOE se comprometa no seu 40 Congreso a traballar desde as institucións para poder alcanzar este fin.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.