A Xunta dá un paso máis para tentar adscribir os terreos de Ence ao porto de Marín e manter así a fábrica na ría
Eleva o asunto ao Consello Consultivo pide "coherencia" ás administracións ante a resposta que se emita.
Por Europa Press / Redacción | Santiago de Compostela | 11/10/2021 | Actualizada ás 14:18
A Xunta eleva este luns a adscrición dos terreos que ocupa a fábrica de Ence en Lourizán á Autoridade Portuaria de Marín e Ría de Pontevedra ao Consello Consultivo de Galicia e pide "coherencia" ás administracións ante a resposta que se emita en relación a esta consulta.
Preguntado tras un acto en Sanxenxo (Pontevedra), o vicepresidente primeiro da Xunta, Alfonso Rueda, explicou que o presidente do Goberno galego, Alberto Núñez Feijóo, asinará este luns a consulta. Así, asegurou que, se o órgano "ve posibilidades" para a adscrición dos terreos, que lembrou que o Porto aceptou, "seguirase traballando".
Ante esta situación, confiou en que "todo o mundo sexa coherente" en relación á resolución, xa que "non tería ningún sentido" que o Concello de Pontevedra que, "tantas veces se apoiou no Consello Consultivo para tomar decisións", concluíse que "non lle vai valer" a resposta se resulta afirmativa. Ademais, reprobou que a Administración Xeral do Estado "refugue" esa vía "sen coñecer os termos da consulta" nin a resposta.
Ante a próxima reunión da mesa que analizará o futuro e a viabilidade dos empregos da pasteira, pediu "ser coherentes e construtivos" e recalcou a importancia de "ver a resposta" da consulta elevada pola Xunta.
En todo caso, o vicepresidente primeiro reiterou a aposta do Executivo autonómico por "defender os postos de traballo" directos e indirectos e afirmou que "fará o que estea na súa man a pesar de non provocar o problema".
Ademais, avanzou que a Xunta "vai tentar formar parte da solución", dado que "as administracións que levaron a esta situación cruzáronse de brazos" e "se desentenderon de conservar os postos de traballo". Para iso, insistiu en que se continuará a "exploración" da posibilidade exposta polos traballadores respecto da adscrición dos terreos co obxectivo de "dar unha solución xurídica ao que agora mesmo é un conflito xurídico" que "pode provocar a saída de Ence" da ría e, por tanto, dos empregos vinculados á fábrica.
