Detido un home por tirar ao chan e roubarlle o bolso a unha muller na Coruña

A Policía Nacional detivo na Coruña un home por un delito de roubo con violencia cometido tras abordar unha muller cando saía do seu coche e quitarlle o bolso.

Segundo informou a Policía Nacional, o feito produciuse á primeira hora da mañá do 13 de setembro, sobre as 8,00 horas, cando unha muller estacionaba o seu vehículo na rúa. Ao saír del co seu bolso na man, "foi empuxada e tirada ao chan, séndolle arrebatado o citado bolso".

A vítima foi arrastrada polo chan uns metros, ata que a correa do bolso rompeu, asegura a Policía, que engade que a muller sufriu lesións consecuencia destes feitos. Na súa denuncia, a prexudicada, ademais de narrar estes feitos, indicou que comprobara como foran utilizados os cartóns de crédito que levaba no seu bolso para realizar diversas compras en distintos establecementos.

Durante a investigación policial logrouse identificar o autor e constatouse as distintas compras realizadas en diversos establecementos cos cartóns de crédito roubadas. Por iso, estableceuse un dispositivo para a localización e detención do home, que se produciu este pasado 13 de outubro.

Tras tramitarse as dilixencias policiais o detido, de 39 anos de idade e que xa fora arrestado en ocasións anteriores por feitos similares, foi posto a disposición da autoridade xudicial.

Coche patrulla da Policía Nacional | Fonte: Europa Press.