O Goberno prepara lecturas de Emilia Pardo Bazán como parte da loita contra a violencia machista

O vindeiro luns 18 de outubro comezarán por toda Galicia os actos de conmemoración do 25 de novembro, Día Internacional da Eliminación da Violencia contra a Muller, organizados pola subdelegación do Goberno na Comunidade. Serán unha trintena de actos que se prolongarán ata o 17 de decembro.

Así, na Coruña, o vindeiro luns a subdelegada do Goberno na Coruña, María Rivas, inaugurará as actividades previstas na cidade herculina cunha xornada sobre estranxeiría e mulleres vítimas de violencia de xénero. Será na sede da subdelegación e dirixirase aos servizos sociais dos concellos e persoal técnico dos Centros de Información da Muller.

María Rivas destacou, a este respecto, o "enorme compromiso" do Goberno fronte á violencia contra as mulleres, á vez que indicou que as actividades están dirixidas a un abanico moi variado da poboación --escolares, vítimas, mulleres estranxeiras, entidades sociais, axentes policiais e técnicos sociais, entre outros--.

Aínda que o acto central da programación terá lugar na semana do 25 de novembro coa entrega no Hostal dos Reis Católicos dos Premios Menina, que recoñecen a persoas ou institucións que destacan pola súa loita fronte á violencia machista, a partir do 22 de outubro, a Fundación Luís Seoane será escenario dun encontro con entidades implicadas na loita contra a violencia de xénero organizado pola Subdelegación do Goberno da Coruña.

O 9 de novembro a Subdelegación, en colaboración co Concello da Coruña, promoverá na Ágora a representación teatral da obra " #2 Pilgrims.", da compañía Redrum, e dous días despois, o 11 de novembro, o Reitorado da Universidade da Coruña acollerá o III Xornada de Formación a Forzas e Corpos de Seguridade do Estado: "Vítimas de violencia de xénero especialmente vulnerables". Nos días seguintes terán lugar diversos actos en distintos puntos das restantes tres provincias galegas, dende xornadas formativas a presentacións, conferencias e charlas; destacando o caso das lecturas de Emilia Pardo Bazán por parte de escolares, que terán lugar en todos as provincias.