O novo conselleiro de Facenda di que os vindeiros anos serán os da "recuperación económica"

Miguel Corgos xura como novo conselleiro de Facenda lembrando ao "gran compañeiro" Valeriano Martínez. "Non foi difícil decidir quen podía substituír a Valeriano. O que foi difícil foi substituír a Valeriano", expresou Feijóo.

Por Europa Press / Redacción | SANTIAGO DE COMPOSTELA | 18/10/2021 | Actualizada ás 10:21

Comparte esta noticia

Miguel Corgos López-Prado tomou posesión este luns como novo conselleiro de Facenda e Administración Pública da Xunta, un nomeamento propiciado pola súpeta morte o pasado 6 de outubro Valeriano Martínez, co que traballou durante sete anos e ao que consideraba "un gran compañeiro".

O presidente da Xunta, Alberto Núñez Feijóo, na toma de posesión de Miguel Corgos como conselleiro de Facenda e Administración Pública no Pazo de Raxoi (Santiago de Compostela), 18/10/21.. XUNTA
O presidente da Xunta, Alberto Núñez Feijóo, na toma de posesión de Miguel Corgos como conselleiro de Facenda e Administración Pública no Pazo de Raxoi (Santiago de Compostela), 18/10/21.. XUNTA

No seu primeiro discurso como titular de Facenda e Administración Pública, tivo palabras en recordo da súa familia, amigos e equipo, pero tamén para Valeriano Martínez, con quen chegou a ter "unha relación moi persoal" para deseñar durante sete anos os orzamentos autonómicos. Ademais, enxalzou a "excelente xestión" realizada polos tres conselleiros precedentes --a Martínez, sumou a Marta Fernández Currás e a Elena Muñoz--, porque marcaron "unha liña a seguir moi clara e difícil de mellorar".

Á toma de posesión acudiron, ademais do resto de membros do Goberno galego, decenas de representantes institucionais e civís de Galicia como o presidente do Parlamento, Miguel Ángel Santalices; o alcalde de Santiago, Xosé Sánchez Bugallo; os reitores das universidades galegas, Antonio López (Santiago), Julio Abalde (A Coruña) e Manuel Reigosa (Vigo); e o presidente da Confederación de Empresarios de Galicia (CEF), Juan Manuel Vieites, entre outros.

"ANOS DE EXPANSIÓN FISCAL" E "RECUPERACIÓN"

Minutos despois deste acto, arrincou a reunión do Consello extraordinario da Xunta para aprobar os orzamentos autonómicos para 2022 antes da súa remisión ao Parlamento.

Neste contexto, Corgos avanzou que os próximos serán "anos de expansión fiscal" e "de recuperación" nos que a súa responsabilidade será "apoiar ás consellerías en busca de financiamento" para os seus proxectos, ao que sumou o reto da negociación do novo sistema de financiamento autonómico e os programas plurianuais de fondo.

Así mesmo, no que respecta á parte de Administración Pública, situou o foco "na dixitalización e modernización" da mesma durante a próxima década para facela "máis accesible", así como a súa intención de "seguir mejroando en transparencia e rendición de contas".

"NON É UNHA TOMA DE POSESIÓN MÁIS"

Pola súa banda, Feijóo pronunciou un discurso marcado pola emoción tras a perda de Valeriano Martínez, alguén "insubstituíble" a quen consideraba un amigo. "Non é unha toma de posesión máis", dixo, xa que esta substitución non se produce nin por unha falta de confianza nin por unha decisión persoal, senón por algo "inevitable" como a morte.

"Non foi difícil decidir quen podía substituír a Valeriano. O que foi difícil foi substituír a Valeriano", expresou o mandatario autonómico, quen de feito avanzou que --ademais da misa funeral que se celebrará na tarde deste luns na Catedral de Santiago-- haberá proximamente unha "pequena homenaxe" en San Caetano.

"Un empregado público desde 1985 que falece no seu despacho ben merece unha homenaxe de todo o sector público autonómico, xa que non só era responsables das contas, senón dos 90.000 empregados que ten a Administración galega", explicou.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta