O Goberno mantén o nome do coruñés Ramón Menéndez Pidal no Premio Nacional de Investigación en Humanidades
Así se reflicte na orde ministerial do pasado 13 de setembro.
Por E.P. | A CORUÑA | 18/10/2021 | Actualizada ás 13:39
O Goberno mantén o nome do coruñés Ramón Menéndez Pidal no Premio Nacional de Investigación en Humanidades, segundo informa o PP tras unha pregunta a este respecto dos senadores galegos Miguel Lorenzo, Pilar Rojo e Miguel Ángel Viso. En concreto, explican que "así se deduce dunha concisa resposta do Executivo" a unha pregunta formulada na comisión de Cultura da Cámara Alta.
A cuestión presentada suscitouse por mor dunha orde do Ministerio de Ciencia que anunciaba no BOE, do pasado 29 de marzo, "unha reestruturación dos premios que ía afectar á súa nomenclatura, que pasaría a ser xenérica, e tamén a fusionar algunhas das modalidades obxecto de recoñecemento", apuntan os populares.
Os senadores preguntaban "polas razóns existentes para eliminar duns galardóns con corenta anos de antigüidade os nomes de científicos e investigadores como Ramón Menéndez Pidal, Santiago Ramón y Cajal, Juan de la Cierva ou Gregorio Marañón".
"Na súa resposta limítase a citar unha orde ministerial do pasado 13 de setembro na que convoca os premios deste exercicio, que desmente a emitida en marzo e cita as diferentes modalidades de premios, dez en total, coa mesma nomenclatura quetenían ata agora", informan os populares.
