A Xunta defende o carácter "social" dos orzamentos "máis altos da historia", onde "7 de cada 10€" van a este fin

Os orzamentos da Xunta de Galicia para 2022 "rompen un teito" e son "os máis altos da historia", ao ascender a 11.627 millóns de euros, segundo destacaron este luns o presidente galego, Alberto Núñez Feijóo, e o novo conselleiro de Facenda, Miguel Corgos.

En rolda de prensa tras a aprobación do proxecto en Consello, o titular do Goberno autonómico cifrou en "máis de sete" de cada 10 os euros que as contas públicas dedican a financiar o gasto social na comunidade.

Así, situou o total do gasto social en 8.660 millóns, cun incremento de 610 respecto dos anteriores orzamentos: 269 dedicados ao reforzo en sanidade (que se sitúan nun total de 4.583 millóns), 179 á educación (en total 2.695 millóns), 126 ás políticas sociais (987 en total) e 37 ao emprego (395).

Son unhas contas, segundo Feijóo, que "non hipotecan o futuro, reducen ao máximo histórico os intereses da débeda, garanten como nunca os servizos públicos e non entorpecen a recuperación das familias" mediante unha rebaixa de impostos que dependen da comunidade. "Son os da recuperación", resumiu.

"Son os da reactivación e a recuperación", resumiu, ás portas de que a comunidade levante a emerxencia sanitaria pola pandemia da covid.

"CONTAS DE VALERIANO MARTÍNEZ"

As contas "de Valeriano Martínez e o seu equipo", como as presentou o xefe do Executivo con referencias emocionadas ao falecido titular de Facenda, ao que quixo render unha "última homenaxe" con esta presentación, entrarán "en tempo e forma" este mércores 20 no Parlamento para a súa tramitación coa previsión de que entren en vigor o 1 de xaneiro.

Igualmente, o seu sucesor no cargo, Miguel Corgos, ata agora director xeral de Orzamentos, tivo palabras de recordo para Martínez, quen morreu no seu despacho o pasado 6 de outubro. Os orzamentos estaban "finalizados" e só houbo que facer "algúns axustes", segundo Núñez Feijóo.

Pola súa banda, Corgos explicou que superan o teito de gasto que se aprobou en agosto --fixado en 11.571 millóns de euros-- polas achegas que recibirá Galicia "que non se coñecían" nese momento.

Ambos valéronse dunha expresión de Martínez ao falar do "crecemento san" que supón reducir a partida destinada aos intereses da débeda ata os 74,1 millóns. É, reivindicou Feijóo, "a única que baixa" de todo o orzamento --en 2021 alcanzaba os 99,7 millóns--.

"REALISTA E PRUDENTE"

De "realista e prudente" cualificou Núñez Feijóo o cadro macroeconómico, que revisa á alza o crecemento para este exercicio, ata o 6%, o mesmo que estima para 2022 tras unha baixada do 8,9% en 2020.

En canto ao paro, sitúao no 12,2% a finais de ano e no 11,7% ao acabar 2022.

Este mesmo luns, a Autoridade Independente de Responsabilidade Fiscal publicou un informe no que considera que as estimacións de crecemento de Galicia para 2021 son "moi pouco probables, aínda que factibles" dentro do contexto de incerteza actual.

Na comparativa con 2021, os dous mandatarios chamaron a atención sobre a existencia de fondos extraordinarios non consolidables vinculados á covid nas contas do pasado ano, por valor de 685 millóns.

Por capítulos de gastos, os investimentos reais ascenden no proxecto do exercicio que vén a 1.441,9 millóns, un 10,3% máis, e as transferencias de capital sitúanse en 1.12,5 millóns, polo que o total de gastos de capital ascenden a 2.554,5 millóns, un 14,6% máis.

Pola súa banda, o xefe do Goberno galego apuntou a un investimento "histórico" de 2.500 millóns que, dixo, hai que sumar a outros 2.500 en 2021.

SUBA SALARIAL DOS FUNCIONARIOS

No caso concreto do emprego público, Corgos reivindicou a "maior dotación da historia" para gastos de persoal, con 84 millóns para facer efectivo o incremento salarial do 2% aos funcionarios.

Neste extremo, sinalou a previsión de dotación de 1.330 prazas nos cadros de persoal das institucións sanitarias públicas, entre as que a Xunta resalta 501 prazas de persoal facultativo, 479 prazas de enfermaría e 162 para persoal residente en formación.

FINANCIAMENTO LOCAL E UNIVERSIDADES

No ámbito do financiamento local, o proxecto de contas para 2022 contempla 488,6 millóns, deles 147 correspondentes a mecanismos de cooperación local e 341,6 a outras transferencias a entidades locais.

É "a maior achega da historia para as entidades locais", segundo a Xunta, con 81 millóns, o que supón, segundo as súas cifras, un incremento do 20%.

Por último, no relativo a universidades, o plan de financiamento estará dotado, de acordo co proxecto presentado este luns, de 469 millóns de euros, fronte aos 444 de 2021.